پاکستان سپر لیگ کے گیارہویں ایڈیشن کی افتتاحی تقریب اور افتتاحی میچ کی تفصیلات سامنے آگئیں۔

پاکستان سپر لیگ کے سی ای او سلمان نصیر نے ٹیم سیالکوٹ اسٹالینز کی ملکیت تبدیلی کے موقع پر پریس کانفرنس میں بتایا کہ افتتاحی تقریب 26 مارچ کو قذافی اسٹیڈیم لاہور میں ہوگی۔

تقریب کے بعد دفاعی چیمپئن لاہور قلندرز اور حیدرآباد کنگزمین کے درمیان افتتاحی میچ کھیلا جائے گا۔

سلمان نصیر کا کہنا تھا کہ پی ایس ایل کا شیڈول چند دنوں میں جاری کردیا جائے گا۔

انہوں نے واضح کیا کہ ہماری ریکی ٹیم نے پشاور اسٹیڈیم کا دورہ کیا ہے، کچھ چیزیں ٹھیک ہونے والی ہیں، کوشش ہوگی کہ پی ایس ایل کے کچھ میچز پشاور میں ضرور ممکن بنائیں۔

سلمان نصیر نے بتایا کہ او زی گروپ نے اپنے تمام مالی معاملات جنوری کے دوسرے ہفتے میں کلیئر کردیے تھے، ان کی بینک گارنٹی ہمارے پاس موجود ہے، اگر یہ ڈیفالٹر ہوتے تو اس وقت میرے ساتھ پریس کانفرنس میں موجود نہ ہوتے، اس حوالے سے تمام باتیں بے بنیاد ہیں۔

ان کا مزید کہنا تھا کہ گوہر شاہ جیسے متحرک اور پرجوش نوجوان کا پی ایس ایل کا حصہ بننا خوش آئند ہے، ان کے جذبے کو سراہتے ہیں۔

سلمان نصیر نے بیرون ملک فائنل رکھنے کے بارے سوال پر بتایا کہ پی ایس ایل کا ایک میچ بیرون ملک اس سال ہوگا یا اگلے سال اس کا فیصلہ چند روز میں ہوجائے گا۔

عالمی ومقامی مارکیٹوں میں 3روزہ وقفے کے بعد سونے اور چاندی کی قیمتوں میں بڑی نوعیت کی کمی ریکارڈ کی گئی۔

بین الاقوامی بلین مارکیٹ میں فی اونس سونے کی قیمت 139ڈالر کی کمی سے 5ہزار 272ڈالر کی سطح پر آگئی۔

ملک میں فی تولہ سونے کی قیمت بھی 13ہزار 900روپے کی کمی سے 5لاکھ 49ہزار 962روپے کی سطح پر آگئی، اس کے علاوہ فی دس گرام سونے کی قیمت 11 ہزار 917روپے گھٹ کر 4لاکھ 71ہزار 503روپے کی سطح پر آگئی۔

فی تولہ چاندی کی قیمت 1146 روپے کی کمی سے 8ہزار 904 روپے کی سطح پر آگئی، فی دس گرام چاندی کی قیمت بھی 986روپے کی کمی سے 7ہزار 633روپے کی سطح پر آگئی

یروشلم: اسرائیل میں قائم امریکی سفارتخانے نے اپنے شہریوں کو مطلع کیا ہے کہ وہ اس وقت انخلا میں براہِ راست مدد فراہم کرنے کی پوزیشن میں نہیں ہے۔

سفارتخانے کی جانب سے جاری سکیورٹی الرٹ میں کہا گیا ہے کہ جو امریکی شہری اسرائیل چھوڑنا چاہتے ہیں، انہیں اسرائیل کی وزارتِ سیاحت کی جانب سے چلائی جانے والی شٹل بسوں کے بارے میں معلومات فراہم کی جا رہی ہیں، جو مسافروں کو مصر کے ساتھ واقع طابا بارڈر کراسنگ تک پہنچا رہی ہیں۔

سفارتخانے نے واضح کیا کہ اگر کوئی شہری اس آپشن کے ذریعے روانگی کا فیصلہ کرتا ہے تو امریکی حکومت اس کی حفاظت کی ضمانت نہیں دے سکتی۔ بیان میں کہا گیا کہ یہ معلومات صرف سہولت کے طور پر فراہم کی جا رہی ہیں۔

مزید کہا گیا ہے کہ بسوں میں شامل ہونے کے لیے امریکی شہریوں کو وزارتِ سیاحت کے ’انخلائی فارم‘ کے ذریعے رجسٹریشن کروانا ہوگی۔

خطے میں بڑھتی سکیورٹی کشیدگی کے باعث مختلف ممالک اپنے شہریوں کو متبادل راستوں سے محفوظ انخلا کی ہدایات دے رہے ہیں۔