اقوامِ متحدہ کے انسانی حقوق کے ادارے کے سوشل میڈیا پلیٹ فارم ایکس (ٹوئٹر) پر جاری بیان کے بعد جانبداری کے الزامات سامنے آ گئے ہیں۔

رپورٹس کے مطابق یو این ہیومن رائٹس کے آفیشل اکاؤنٹ نے پاکستان کی جانب سے کابل پر مبینہ حملے سے متعلق ایک بیان جاری کیا، جس میں تحقیقات کا مطالبہ کیا گیا۔ اس بیان کے بعد سوشل میڈیا صارفین کی جانب سے شدید ردعمل دیکھنے میں آیا۔

صارفین کا کہنا ہے کہ عالمی ادارے نے یکطرفہ مؤقف اپنایا اور ان واقعات کو نظر انداز کیا جو افغانستان سے پاکستان کے اندر پیش آ رہے ہیں۔ کئی صارفین نے الزام عائد کیا کہ اس طرح کے بیانات سے غلط معلومات اور پروپیگنڈے کو فروغ ملتا ہے۔

بعض صارفین نے مطالبہ کیا کہ کابل واقعے کی تحقیقات سے پہلے افغانستان میں موجود شدت پسند گروہوں، جیسے ٹی ٹی پی اور بی ایل اے کی سرگرمیوں کا بھی جائزہ لیا جائے۔

سوشل میڈیا پر یہ مؤقف بھی سامنے آیا کہ انسانی حقوق کے اصول سب کے لیے یکساں ہونے چاہئیں اور عالمی اداروں کو ہر واقعے پر متوازن ردعمل دینا چاہیے۔

دوسری جانب بعض تجزیہ کاروں کا کہنا ہے کہ اقوامِ متحدہ جیسے معتبر ادارے سے وابستہ اکاؤنٹ کا یکطرفہ بیان دینا قابلِ تشویش ہے، جبکہ خطے میں سرحد پار دہشتگردی کے معاملات پر خاموشی بھی سوالات کو جنم دیتی ہے۔

کچھ حلقوں کا یہ بھی دعویٰ ہے کہ کابل میں ہسپتال پر حملے اور ہلاکتوں سے متعلق بعض اطلاعات کو مقامی سطح پر پہلے ہی مسترد کیا جا چکا ہے، تاہم اس حوالے سے آزادانہ تحقیقات کی ضرورت پر زور دیا جا رہا ہے۔

سینئر صوبائی وزیر شرجیل انعام میمن کی ہدایت پر محکمہ ٹرانسپورٹ حکومت سندھ نے عیدالفطر کے موقع پر  کراچی ریجنل ٹرانسپورٹ اتھارٹی سمیت سندھ کے تمام ریجنل ٹرانسپورٹ اتھارٹیز کے  افسران کی چھٹیاں منسوخ کر دیں۔

نوٹیفیکیشن میں کہا گیا ہے کہ عید پر محکمہ ٹرانسپورٹ کے تمام افسران مسافر عوام کی سہولت کے لیے ڈیوٹی پر موجود ہوں گے۔ اوورچارجنگ کی شکایات کے ازالے کے لیے محکمہ ٹرانسپورٹ نے خصوصی انتظامات کیے ہیں۔

سندھ بھر میں 3000 سے زائد گاڑیوں کی چیکنگ کی گئی۔ چیکنگ  کے دوران زائد کرایہ وصولی پر مسافروں کو ایک کروڑ 40 لاکھ روپے سے زائد رقم  واپس دلائی گئی۔ خلاف ورزی کرنے والے ٹرانسپورٹرز پر 45 لاکھ روپے سے زائد جرمانے عائد کیے گئے۔

محکمہ ٹرانسپورٹ نے کہا کہ اوورچارجنگ پر زیرو ٹالرنس ہے، موقع پر ہی کارروائیاں کی گئیں۔

صوبائی وزیر ٹرانسپورٹ کی ہدایت پر عید کے موقع پر مسافروں کو ریلیف فراہم کرنے کے لئے اقدامات کئے گئے ہیں۔ محکمہ ٹرانسپورٹ نے کہا کہ محکمہ ٹرانسپورٹ کی جانب سے عید کے موقع پر صوبہ بھر میں زائد کرایہ لینے والوں کے خلاف بھرپور آپریشن جاری ہے۔

محکمہ ٹرانسپورٹ نے کہا کہ مسافروں سے زائد کرایہ وصول کرنے والوں کے خلاف سخت ایکشن لیا جا رہا ہے۔