ایرانی وزیرِ خارجہ عباس عراقچی نے کہا ہے کہ اگر جب تک ضروری ہوگا، ایران اپنی حفاظت جاری رکھے گا۔

میڈیا رپورٹس کے مطابق ایرانی وزیر خارجہ نے ایک بیان میں کہا کہ اگر ہم پر باقاعدہ جنگ مسلط کی گئی تو ایران اس وقت تک لڑتا رہے گا جب تک ضروری ہوگا۔

ایران اس حالیہ کشیدگی میں اپنی پوزیشن کو دفاع کے طور پر پیش کرتا ہے کیونکہ سب سے پہلے اسرائیل اور امریکا نے حملوں کا آغاز کیا ہے۔

وزیر خارجہ نے کہ جب تک ضروری ہوگا اپنی حفاظت جاری رکھیں گے۔ ایران مزید فوجی کارروائی یا جوابی حملے جاری رکھ سکتا ہے۔ انہوں نے کہا یہ اُس وقت جاری رہے گا جب تک وہ اپنے سیکیورٹی خدشات کو ختم نہ سمجھ لے۔

امیر جماعت اسلامی حافظ نعیم الرحمن کا ادارہ نور حق میں عید کی تقریب سے خطاب کرتے ہوئے کہا کہ پاکستانیوں سمیت امت مسلمہ کو عید کی مبارکباد پیش کرتا ہوں، غزہ میں لاکھوں لوگ بے گھر ہیں، ملبے کا ڈھیر بنا دیا ہے، استقامت سے طاغوت کا مقابلہ کرنے والے مجاہدین کو سلام پیش کرتے ہیں۔

انہوں نے کہا کہ ایران پر امریکا اور اسرائیلی حملے کا آغاز اسکول سے کیا گیا، اسکول پر میزائل حملے میں بچیاں شہید ہوئیں، ایرانی قیادت کی شہادت کے بعد بھی پوری قوم متحد ہے، حملہ آوروں کا ریجیم کی تبدیلی کا خواب پورا نہیں ہوا، ایپسٹین ریجیم کو اب تبدیل ہونا چاہیے، مشرق وسطی آگ و خون میں لپٹا ہوا ہے۔

ان کا کہنا تھا کہ ملک میں عوامی سطح پر اتحاد موجود ہے، حکمران طبقے نے عوام کو تقسیم کیا ہوا ہے، حکمرانوں کا اقتدار امریکا کی مرہون منت ہوتا ہے، فرقہ وارانہ تقسیم کی کوشش کرنے والے صیہونی ایجنٹ ہیں، ہمارا فرض ہے ایران کی حمایت کی جائے اور ساتھ کھڑے ہوں۔

امریکی صدر ایک ہی روز میں الگ الگ بیانات دیتے ہیں، مزاحمت زندگی کی علامت ہے، عوام کو ریلیف دینے کے بجائے ہر لٹر پر 100 روپے لیوی اور ٹیکس وصول کیا جارہا ہے، عالمی بحران کو مدنظر رکھتے ہوئے لیوی کو ختم کیا جائے، آئی پی پیز کو ادائیگی روکی جائے اور معاہدوں کی جانچ کی جائے، عیاشیاں حکمران طبقہ کرے اور قوم سے قربانی کی اپیل کی جارہی ہے۔

انہوں نے کہا کہ لیوی کم کریں تو پیٹرولیم مصنوعات کی قیمتیں کم ہوجائیں گی، غریب اور متوسط طبقے کو ریلیف دیا جانا چاہیے، زمینداروں پر ٹیکس نہیں، تنخواہ دار طبقے پر بھاری ٹیکس عائد ہے، سیاسی جماعتیں ایران پر حملے کے بعد امریکا کا نام لینے کو تیار نہیں، قوم کو ایسے لوگوں کو بے نقاب کرنا چاہیے۔

مرکزی صدر پی ٹی آئی چوہدری پرویزالٰہی نے نماز عید الفطر مسجد خاتم الانبیاء ﷺ گجرات میں ادا کی، راسخ الٰہی، میاں عمران مسعود، عثمان ظہورالٰہی، چودھری کاشف سندھو، چودھری خالد سندھو، چودھری نثار احمد بھی ہمراہ تھے۔

چودھری پرویزالٰہی نے ملک و قوم کی سلامتی، غزہ اور ایران سمیت جہاں جہاں مسلمان شہید ہوئے ان کیلئے دعا کی، اور میڈیا سے گفتگو کرتے ہوئے کہا کہ میں اپنی اور اپنے خاندان کی طرف سے پوری قوم کو تہہ دل سے عید کی مبارکباد پیش کرتا ہوں، بانی پی ٹی آئی کیساتھ زیادتی ہورہی ہے، انہوں نے کسی کا کوئی نقصان نہیں کیا۔

ان کا کہنا تھا کہ پچھلے الیکشن میں اللہ تعالیٰ کی کیسی مدد آئی آپ سب نے دیکھا، اللہ کو منظور ہوا تو انشاء اللہ دھاندلی کی کسر نکل جائے گی، کچھ باتیں ایسی ہوتی جو تجربے سے انسان سیکھتا ہے بانی پی ٹی آئی نے میری باتوں کو مانا میرا تجربہ ہے، اب بھی سب نے صبر کیساتھ چلنا ہے، آپ نے بس گھبرانا نہیں ہے۔

ہر نماز کے بعد دعا کریں کہ اللہ تعالیٰ مسلمانوں کو فتح نصیب فرما، اسرائیل اور اس کے تکبرسے بھرے حمایتیوں کو اللہ تعالیٰ عبرتناک سزا دے، ن لیگ کی شکل میں کچھ چیزیں آئی ہیں اللہ ان کو ہدایت دے، ن لیگ والے جب آتے ہیں عوام کا تیل تو نکالتے ہی ہیں مگر اس بار جو تیل پڑا ہوا تھا وہ بھی نکال دیا، 10ارب کا جہاز لینے کی کیا ضرورت تھی جہاز میں بیٹھ کر اوپر سے بندے چھوٹے نظر آتے ہیں۔

انہوں نے کہا کہ جب ن لیگ نے عوام سے تعلق ہی ختم کر دیا تو اب جہاز لینے جیسے ہی کام کرنے ہیں، سیاسی طور پر عوام باشعور ہو چکی ہے، لوگوں کو ان حکمرانوں نے کچھ نہیں دیا، بانی چیئرمین تحریک انصاف جناب عمران خان سے ان کی بہنوں کی ملاقاتوں پر مسلسل پابندی پر سخت تشویش ہے۔

پوری دنیا جان چکی ہے کہ عمران خان کی ایک آنکھ کی بینائی حکومت کی دانستہ غفلت کی وجہ سے ضائع ہو رہی ہے، ملکی آئین اور قانون کے ساتھ ساتھ عالمی قوانین کی رو سے بھی ہر قیدی کا بنیادی انسانی حق ہے کہ بیماری کے دوران اس کو بغیر کسی رکاوٹ کے اس کے خاندان کے ساتھ ملنے دیا جائے، عمران خان کی صحت کے مسئلہ پر حکومت بیمار ذہنیت کا مظاہرہ کر رہی ہے، اس سے قوم میں روز بروز اضطراب بڑھ رہا ہے اور ملکی یکجہتی و اتحاد بھی پارہ پارہ ہو رہا ہے۔

ان کا کہنا تھا کہ ملکی یکجہتی اور اتحاد کی پاکستان کو آج جتنی ضرورت ہے شاید پہلے کبھی نہ تھی، عمران خان سمیت تمام سیاسی قیدیوں کی رہائی میں مختلف حیلوں بہانوں سے رکاوٹ پیدا کرنا آئین و قانون کی خلاف ورزی ہے، عمران خان سمیت تمام سیاسی قیدیوں کو مسلسل اپنے پیاروں سے دور رکھنا شرف انسانیت کے بھی منافی ہے۔