پیٹرول کی قیمت میں گزشتہ شب 80 روپے کی کمی سے شہری غیر مطمئن ہیں جبکہ حکومتی  اعلان کے باوجود بائیک رائیڈرز تاحال رعایت ملنے کے منتظر ہیں۔

ایکسپریس نیوز کے مطابق وزیر اعظم شہباز شریف کی جانب سے پیٹرول کی قیمت میں گزشتہ شب کمی کے اعلان پر مکمل عملدرآمد شروع ہوگیا ہے۔

وفاقی حکومت نے پٹرول 458 روپے سے کم کر کے 378 روپے فی لیٹر مقرر کر دیا ہے، جس کے بعد پیٹرول پمپس پر نئی قیمتوں میں پیٹرول فروخت کیا جا رہا ہے۔

دوسری جانب ملک گیر احتجاج کے بعد پٹرول 80 روپے سستا ہونے پر شہریوں نے اس کمی کو مسترد کر دیا ہے۔  شہریوں کا کہنا ہے کہ پیٹرول کی قیمتیں اب بھی عوام اور تنخواہ داروں کی دسترس سے باہر ہیں۔

شہریوں کے مطابق مہنگا پیٹرول ہونے کے نتائج تمام شعبہ زندگی پر پڑتے ہیں، جس کی وجہ سے مہنگائی کا ایک نیا طوفان آ چکا ہے، جس میں عام آدمی کا گزارہ کرنا ناممکن ہو چکا ہے۔

دریں اثنا حکومتی اعلان کے باوجود موٹر سائیکل سواروں کے لیے 100 روپے فی لیٹر کی رعایت سے متعلق ایس او پیز تاحال عملی شکل میں سامنے نہیں آ سکیں، جس سے بائیک رائیڈرز میں شدید تشویش پائی جاتی ہے۔

علاوہ ازیں ڈیزل کی قیمت میں کمی نہ کرنے کے باعث ٹرانسپورٹ کے کرایوں میں اضافہ بھی برقرار ہے۔ ٹرانسپورٹ گاڑیاں ڈیزل استعمال کرتی ہیں جو اب بھی ریکارڈ سطح پر مہنگا ہے، جس کی وجہ سے اسٹاپ ٹو اسٹاپ کرایہ 60 روپے تک پہنچ چکا ہے اور عوام پریشان ہیں۔

ایران کے خلاف جنگ کے دوران اب تک 365 اہلکار زخمی ہو چکے ہیں۔

امریکی محکمہ دفاع پینٹاگون نے تصدیق کی ہے کہ اعداد و شمار کے مطابق ایران کے خلاف جنگ کی شروعات کے بعد سے اب تک اس کی افواج کے 365 اہلکار زخمی ہو چکے ہیں۔

اب تک امریکی فوج کے 247، بحریہ کے 63، 19 مرینز اور فضائیہ کے 36 اہلکار اس جنگ کے دوران زخمی ہو چکے ہیں۔

پینٹاگون کے اعداد و شمار کے مطابق اس جنگ کے دوران اب تک 13 اہلکار ہلاک ہو چکے ہیں۔

کابل میں زلزلے سے مکان منہدم ہونے کیوجہ سے ایک ہی خاندان کے آٹھ افراد جاں بحق ہوگئے ہیں۔

طالبان حکومت نے تصدیق کی ہے کہ جمعے کی شام آنے والے زلزلے کے نیتجے میں کابل صوبے کے بگرامی ضلع میں کم از کم آٹھ افراد جاں بحق ہو گئے ہیں۔

حکام کا کہنا ہے کہ جمعے کی شام آنے والے زلزلے کی شدت 5٫8 تھی جبکہ اس کی گہرائی 181 کلو میٹر تھی۔ زلزلے کے جھٹکے افغانستان، پاکستان اور انڈیا میں بھی محسوس کیے گئے۔

کابل گورنر کے میڈیا آفس کا کہنا ہے کہ زلزلے کے شدید جھٹکوں سے ضلع بگرامی کے علاقے گوسفندرہ میں ایک رہائشی مکان منہدم ہوا۔ صوبائی ترجمان حافظ بشارت نے کہا کہ تمام متاثرین ایک ہی خاندان کے افراد تھے۔ جن میں باپ، ماں، چار بیٹیاں اور دو بیٹے شامل ہیں۔

زلزلہ 181 کلومیٹر کی گہرائی میں آیا جس سے عام طور پر معمولی نقصان ہوتا ہے لیکن افغانستان میں دیہی کچے مکانات اور خستہ حال ڈھانچوں کی حالت کو دیکھتے ہوئے نسبتاً ہلکے زلزلے بھی بڑے نقصان کا باعث بن سکتے ہیں۔