کراچی:

شہر قائد کے علاقے بن قاسم میں پولیس نے بڑی کارروائی کرتے ہوئے اسٹیل مل سے لوہا اور تانبہ چوری کرنے والے 9 رکنی گروہ کو گرفتار کر لیا۔

ترجمان ملیر پولیس کے مطابق یہ کارروائی پیر اور منگل کی درمیانی شب پاکستان اسٹیل ملز کے قریب کی گئی جہاں قیمتی اسکریپ کی مسلسل چوری کی اطلاعات پر کریک ڈاؤن جاری تھا۔

پولیس نے بروقت کارروائی کرتے ہوئے ملزمان رمیض، جہانگیر، ولی خان، آنوش، سلمان، وقاص، ناصر، یاسین اور اعجاز کو گرفتار کر لیا۔

ملزمان کے قبضے سے 80 کلوگرام سے زائد چوری شدہ کاپر وائر بھی برآمد کی گئی ہے۔

حکام کے مطابق گرفتار گروہ اسٹیل مل سے اسکریپ چوری کی متعدد وارداتوں میں ملوث تھا اور چوری شدہ سامان مختلف گوداموں میں فروخت کرتا تھا۔

پولیس نے ملزمان کے خلاف مقدمات درج کر کے مزید تفتیش شروع کر دی ہے، جبکہ ان کے دیگر ساتھیوں کی تلاش کیلئے بھی کارروائیاں جاری ہیں۔

اسلام آباد:

دنیا بھر کی طرح یوم پاکستان کے موقع پر اوٹاوا اور واشنگٹن ڈی سی میں پاکستانی سفارتی مشنز کے زیر اہتمام پروقار تقاریب منعقد ہوئیں جہاں حب الوطنی کا جذبہ عروج پر رہا۔

اوٹاوا میں پاکستان ہائی کمیشن میں تقریب کا آغاز قومی پرچم کشائی سے ہوا جس کی قیادت محمد سلیم نے کی۔

اس موقع پر پاکستانی کمیونٹی، طلبہ، سفارتی عملے اور پاکستان کے دوستوں کی بڑی تعداد شریک ہوئی۔

تقریب میں آصف علی زرداری، شہباز شریف اور اسحاق ڈار کے خصوصی پیغامات پڑھ کر سنائے گئے جن میں بانیان پاکستان کے وژن کو آگے بڑھانے کے عزم کا اعادہ کیا گیا۔

ہائی کمشنر محمد سلیم نے اپنے خطاب میں قرارداد لاہور کی تاریخی اہمیت کو اجاگر کرتے ہوئے کہا کہ پاکستان ترقی، امن اور عالمی روابط کے فروغ کیلئے مسلسل کوشاں ہے۔

انہوں نے پاکستان اور کینیڈا کے درمیان تجارت، تعلیم اور عوامی روابط میں بڑھتے تعاون کو بھی سراہا۔

دوسری جانب سفارت خانہ پاکستان واشنگٹن میں بھی یوم پاکستان کی 87ویں سالگرہ انتہائی جوش و خروش سے منائی گئی۔

تقریب میں امریکی محکمہ خارجہ کے حکام، میڈیا نمائندگان اور پاکستانی کمیونٹی رہنماؤں نے شرکت کی۔

تقریب میں پاکستان کے سفیر رضوان سعید شیخ نے قومی ترانے کی دھن پر پرچم کشائی کی جبکہ امریکی محکمہ خارجہ کے عہدیدار جان مارک پومرشیم نے اپنے خطاب میں پاکستان اور امریکا کے تعلقات کو مضبوط اور دیرپا قرار دیا۔

انہوں نے کہا کہ دونوں ممالک نے مشترکہ چیلنجز سے نمٹنے اور باہمی تعلقات کو فروغ دینے کیلئے مسلسل تعاون کیا ہے اور مستقبل میں بھی یہ شراکت داری مزید مستحکم ہوگی۔

اپنے خطاب میں سفیر پاکستان رضوان سعید شیخ نے کہا کہ یوم پاکستان دراصل اس عہد کی تجدید ہے جو بانیان پاکستان نے 1940 میں کیا تھا۔

انہوں نے دہشت گردی کے خلاف پاکستان کی قربانیوں، علاقائی امن میں کردار اور امریکا کے ساتھ اقتصادی و سیاسی تعلقات کو مزید مضبوط بنانے کے عزم کو دہرایا۔

تقریبات کے اختتام پر پاکستان کی ترقی، استحکام اور خوشحالی کیلئے خصوصی دعائیں کی گئیں جبکہ واشنگٹن میں کیک کاٹ کر یوم پاکستان کی خوشیاں بھی منائی گئیں۔

سیالکوٹ:

ایک افسوسناک ٹریفک حادثے نے 5 قیمتی جانیں نگل لیں، جہاں تیز رفتار کار بے قابو ہو کر سڑک کنارے کھڑی بس سے جا ٹکرائی۔

ریسکیو ذرائع کے مطابق حادثہ لکھن پور اسٹاپ، پسرور روڈ پر پیش آیا، جہاں ایک کار جو سیالکوٹ سے پسرور جا رہی تھی اچانک تیز رفتاری کے باعث کنٹرول سے باہر ہو گئی اور ایک میرج ہال کے سامنے کھڑی بس سے زور دار ٹکر ہو گئی۔

حادثے کے نتیجے میں کار میں سوار پانچوں افراد موقع پر ہی جاں بحق ہو گئے۔ اطلاع ملتے ہی ریسکیو 1122 کی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔

ریسکیو حکام کے مطابق تین ایمبولینسز اور دیگر گاڑیوں نے آپریشن میں حصہ لیا جبکہ ٹیموں نے گاڑی میں پھنسے افراد کی لاشوں کو نکال کر اسپتال منتقل کیا۔