قومی کرکٹ ٹیم کی سلیکشن کمیٹی کے رکن عاقب جاوید کا کہنا ہے کہ ٹیم کا انتخاب کوئی ایک شخص اکیلے نہیں کرتا۔

قذافی اسٹیڈیم لاہور میں سلیکشن کمیٹی کے ممبران عاقب جاوید، مصباح الحق، سرفراز احمد اور اسد شفیق نے مشترکہ پریس کانفرنس کی۔

عاقب جاوید کا کہنا تھا کہ ٹیم کا انتخاب سلیکشن کمیٹی، کوچ اور کپتان کی مشاورت سے ہوتا ہے۔

انہوں نے کہا کہ بدقسمتی سے ٹی ٹوئنٹی ورلڈکپ میں ٹیم توقعات پر پورا نہیں اترسکی لیکن کارکردگی بہتر رہی۔

عاقب جاوید کا کہنا تھا کہ بھارت سے ہارنے کا دکھ بہت ہوتا ہے، لیکن ہم ان سے آج تک نہیں جیت سکے ہیں۔ سپر ایٹ میں صرف ایک میچ ہارے، ایک بارش کی نظر ہوگیا جس کے بعد رن ریٹ پر باہر ہوگئے۔

انہوں نے مزید کہا کہ سری لنکا کے خلاف میچ میں جیسی پچ تھی اس پر کسی ٹیم کو کم اسکور پر آؤٹ ہونا ناممکن تھا۔

عاقب جاوید کا کہنا تھا کہ پاکستان ٹیم کی کارکردگی میری نظر میں بہتر ہوئی ہے، ہم نے جنوبی افریقا کو جنوبی افریقا میں، آسٹریلیا کو آسٹریلیا میں ہرایا۔

انہوں نے کہا کہ بنگلادیش کے خلاف سیریز میں کسی کو ڈراپ نہیں کیا گیا، آرام دے کر نئے کھلاڑیوں کو موقع دیا گیا ہے۔ بابر اعظم، فخر زمان اور سلمان مرزا ابھی کھیلنے کے لیے فٹ نہیں ہیں۔

ایک سوال کے جواب میں عاقب جاوید کا کہنا تھا کہ اب دوبارہ وسیم اور وقار جیسے بولرز نہیں آسکتے، اس دور میں صرف بمراہ کے علاوہ کوئی ایسا بولر نہیں ہے جسے کھیلنا مشکل ہو۔

سرفراز احمد کا کہنا تھا ہمارے پاس دو تین وکٹ کیپرز آپشن کے طور پر موجود ہیں، نئے کھلاڑیوں کو اگلے سیزن میں موقع دیں گے۔

اسلام آباد:

صدر مملکت آصف علی زرداری نے کہا ہے کہ افغان حکومت نے پاکستانی شہریوں کو نشانہ بنا کر سرخ لکیر پار کردی ہے۔

پاکستان کے شہری علاقوں کو نشانہ بنانے کے لیے افغان طالبان کے ڈرون حملوں کی شدید مذمت کرتے ہوئے صدر آصف زرداری نے کہا کہ  دہشت کے ذریعے افغانستان میں قائم غیر قانونی حکومت مسلسل اپنی ذمہ داریوں سے فرار ہورہی ہے۔

انہوں نےکہا کہ افغان حکومت دہشت گرد گروہوں کو محفوظ پناہ گاہیں فراہم نہ کرنے کی یقین دہانیوں  کو نظر انداز کر رہی ہے۔ اب اس حکومت  میں اسلامی دنیا کی ایک بڑی فوجی طاقت کو چیلنج کرنے کی کوشش کی جا رہی ہے۔

صدر مملکت کا کہنا تھا کہ افغان حکومت ایک طرف دوست ممالک سے مذاکرات کی کوشش کر رہی ہے اور دوسری طرف اس نے پاکستان کے شہریوں کو نشانہ بنا کر سرخ لکیر پار کر دی ہے۔

آصف زرداری کا کہنا تھا کہ پاکستان خطے میں امن و استحکام کے فروغ کے لیے مصروف عمل ہے۔

صدر نے کوئٹہ، کوہاٹ اور راولپنڈی میں ڈرون حملوں سے زخمی ہونے والے بچوں اور دیگر شہریوں کی جلد صحتیابی کے لیے دعا بھی کی۔ انہوں نے اس بات کو دہرایا کہ پاکستان کی مسلح افواج اور سیکیورٹی ادارے ملک کے دفاع اور عوام کے تحفظ کے لیے مکمل طور پر تیار ہیں۔

اسلام آباد:

سہولت اکاؤنٹ کے ذریعے اسٹاک مارکیٹ میں سرمایہ کاری کی حد میں اضافہ کردیا گیا۔

ایکسپریس نیوز کے مطابق سیکیورٹیز اینڈ ایکسچینج کمیشن آف پاکستان (ایس ای سی پی) نے سہولت اکاؤنٹ کے ذریعے سرمایہ کاری کی حد 10 لاکھ روپے سے بڑھا کر 30 لاکھ روپے کرنے کا اعلان کیا ہے۔

ایس ای سی پی کے مطابق سہولت اکاؤنٹ پہلی بار اسٹاک مارکیٹ میں سرمایہ کاری کے لیے سرمایہ کاروں کو آسان اور محفوظ طریقہ فراہم کرتا ہے، جہاں سرمایہ کار اب ایک سے زائد بروکرز کے ساتھ سہولت اکاؤنٹس کھول سکیں گے، تاہم ایک بروکر کے ساتھ ہر سرمایہ کار صرف ایک سہولت اکاؤنٹ رکھ سکے گا۔

مزید بتایا گیا ہے کہ سہولت اکاؤنٹ صرف شناختی کارڈ کے ذریعے کھولا جا سکتا ہے اور یہ آن لائن بھی دستیاب ہے، جس سے سرمایہ کاروں کو مزید سہولت حاصل ہوگی۔

ایس ای سی پی کے مطابق اسٹاک مارکیٹ میں انفرادی سرمایہ کاروں کے سب اکاؤنٹس کی تعداد 5 لاکھ 42 ہزار ہے جبکہ انویسٹر اکاؤنٹس اور روشن ڈیجیٹل اکاؤنٹ کی تعداد 1 لاکھ 44 ہزار ہے۔

کمیشن نے سرمایہ کاروں کو ہدایت کی ہے کہ غیر مجاز غیر ملکی سرمایہ کاری پلیٹ فارمز کے بجائے پاکستان اسٹاک ایکسچینج میں سرمایہ کاری کریں اور نوجوان اس سہولت کے ذریعے کیپٹل مارکیٹ میں شمولیت اختیار کریں۔