کراچی:

جوڈیشل مجسٹریٹ ایسٹ کی عدالت نے غیر قانونی کال سینٹر کے ذریعے شہریوں کو لوٹنے کے مقدمے میں نامزد تمام ملزمان کی ضمانت منظور کر لی۔

ملزمان میں نادر، عادل اور ان کے دیگر ساتھی بھی شامل ہیں۔ عدالت نے تمام ملزمان کو رہا کرنے کے عوض ایک ایک لاکھ روپے کے مچلکے جمع کروانے کا حکم دیا ہے۔

یاد رہے کہ این سی سی آئی اے نے شاہراہِ فیصل پر قائم اس کال سینٹر پر خفیہ اطلاع پر چھاپا مار کارروائی کی تھی۔

حکام کے مطابق ملزمان بینکوں کے نمائندے بن کر شہریوں سے فراڈ کرتے تھے۔ کارروائی کے دوران حساس مالیاتی ڈیٹا اور اسپوف کالنگ سافٹ ویئر بھی برآمد ہوئے ہیں۔

ملزمان کے خلاف پیکا ترمیمی ایکٹ 2025 کے تحت مقدمہ درج کیا گیا تھا۔

وفاقی حکومت نے معاہدے کے برعکس سولر سسٹم سے بجلی بنانے والے صارفین کے لیے بلنگ کے طریقہ کار میں ترمیم کر دی ہے۔

بجلی کی تقسیم کار کمپنیوں میں اضافی بجلی کو ’صفر‘ یونٹ ڈکلیئر کر دیا گیا ہے۔ اس اقدام کے ساتھ ہی معاہدے کی خلاف ورزی کرنے والے صارفین کے کنکشن پر ’ایکسپورٹ ایم ڈی آئی چیک‘ نافذالعمل کر دیا گیا ہے۔

نئے طریقہ کار کے تحت اس چیک کے نفاذ کے بعد اضافی پینلز سے بننے والی بجلی پر دیا جانے والا ریلیف مکمل طور پر ختم کر دیا گیا ہے۔

حکومتی فیصلے کے مطابق اضافی بجلی سسٹم پر شامل تو ہو جائے گی، تاہم نیٹ میٹرنگ پالیسی کے تحت اس پر کوئی ریلیف فراہم نہیں کیا جائے گا۔

حکومت کی جانب سے ایکسپورٹ ایم ڈی آئی ریڈنگ کی بنیاد پر اضافی جنریشن پر ریلیف بند کر دیا گیا ہے۔ ساتھ ہی منظور شدہ جنریشن لائسنس سے زیادہ پینلز لگانے کی صورت میں ایکسپورٹ یونٹس پر بھی ریلیف ختم کر دیا گیا ہے۔

ایران کی پاسدارانِ انقلاب نے دعویٰ کیا ہے کہ اس نے نئے میزائل سسٹمز کے ساتھ امریکی اور اسرائیلی اہداف کو نشانہ بنایا ہے۔ یہ دعویٰ پاسدارانِ انقلاب کے شعبہ تعلقاتِ عامہ کی جانب سے جاری بیان میں کیا گیا۔

بیان کے مطابق ایرانی مسلح افواج نے ’آپریشن وعدہ صادق 4‘ کی 88 ویں لہر کے دوران مشترکہ اور ہمہ جہت کارروائیاں کیں، جنہیں حزب اللہ کے شہدا کے نام کیا گیا۔

حکام کے مطابق ان حملوں کا مقصد دشمن کی عسکری صلاحیت کو کمزور کرنا اور خطے میں دباؤ بڑھانا ہے۔

پاسدارانِ انقلاب نے دعویٰ کیا کہ ان کارروائیوں میں جدید اور بھاری میزائل سسٹمز استعمال کیے گئے، جن میں عماد، خرم شہر-4 اور قدر جیسے میزائل شامل ہیں۔

ان میزائلوں کے ذریعے اسرائیل کے مختلف علاقوں میں اہداف کو نشانہ بنانے کا دعویٰ کیا گیا، جن میں بیرشیبا، الجلیل، نقب اور تل نوف ایئر بیس جیسے مقامات شامل ہیں۔ اس کے علاوہ بنی براک میں ایک مبینہ اہم اجلاس کے مقام کو بھی نشانہ بنانے کا ذکر کیا گیا۔

بیان میں مزید کہا گیا کہ پاسدارانِ انقلاب کی بحریہ اور فضائیہ نے خطے میں امریکی فوجی اڈوں کو بھی نشانہ بنایا۔ ان میں علی السلیم ایئر بیس، ال دفرہ ایئر بیس اور وکٹوریا بیس شامل ہیں، جہاں ڈرونز اور گائیڈڈ میزائلز کے ذریعے حملے کیے گئے۔

ایرانی حکام کے مطابق ان کارروائیوں میں جدید حکمت عملی اپنائی گئی ہے اور مزاحمتی محاذ کے ذریعے جنگ کے دائرہ کار کو مرحلہ وار بڑھایا جا رہا ہے۔ بیان میں کہا گیا کہ یہ پیش رفت میدانِ جنگ میں ایک اہم اسٹریٹجک تبدیلی کی عکاسی کرتی ہے۔

پاسدارانِ انقلاب کا کہنا ہے کہ ان کا طویل المدتی ہدف خطے میں اسرائیلی اور امریکی فوجی طاقت کو کمزور کرنا ہے، تاکہ مستقبل میں اپنے اسٹریٹجک مقاصد حاصل کیے جا سکیں۔