کراچی:

ایف آئی اے امیگریشن نے جعلی تعلیمی اسناد پر نارتھ سائپرس جانے کی کوشش ناکام بناکر مسافر کو آف لوڈ کردیا۔

ترجمان ایف آئی اے کے مطابق امیگریشن کے جناح ٹرمینل ائیرپورٹ پر تعینات عملے نے کارروائی کے دوران مسافر کو جعلی ڈگریوں کے شبے پر روکا، چکوال سے تعلق رکھنے والا مسافر محمد عاصم نارتھ سائپرس کے لیے اسٹوڈنٹ ویزا پر سفر کر رہا تھا۔

امیگریشن کلیئرنس کے دوران کاؤنٹر آفیسر نے مسافر کو مزید جانچ پڑتال کے لیے جی آر او کے حوالے کیا، مسافر کی سفری دستاویزات اور پروفائلنگ کے دوران اس کے تعلیمی کاغذات کی تفصیلی جانچ کی گئی۔

مسافر کی جانب سے فیڈرل بورڈ آف انٹرمیڈیٹ اینڈ سیکنڈری ایجوکیشن اسلام آباد کے سیکنڈری اسکول سرٹیفکیٹ (2010) اور ہائر سیکنڈری اسکول سرٹیفکیٹ (2012) پیش کیے گئے، اسی طرح مسافر نے یونیورسٹی آف لاہور سے بی ایس کمپیوٹر سائنس کی ڈگری اور ٹرانسکرپٹ بھی پیش کیے، جانچ پڑتال کے دوران مذکورہ تعلیمی دستاویزات مشکوک اور جعلی ہونے کا شبہ ظاہر ہوا۔

مزید تکنیکی تصدیق کے دوران دستاویزات پر موجود وزارت خارجہ کے مبینہ تصدیقی لیبل پر درج کیو آر کوڈ ایک مشکوک اور غیر سرکاری ویب سائٹ پر ری ڈائریکٹ ہوتا پایا گیا جس سے شبہ پیدا ہوا کہ وزارت خارجہ کی تصدیق جعلی اور دھوکا دہی سے تیار کی گئی ہے۔

مزید تفتیش کے دوران مسافر نے انکشاف کیا کہ مذکورہ تعلیمی اسناد اسلام آباد کے علاقے ڈی ایچ اے فیز 2 میں واقع اے ٹی آر اے سی کنسلٹنٹ کے نمائندے ارسلان کے ذریعے حاصل کی گئیں، مسافر کے مطابق مذکورہ ایجنٹ کو آن لائن ٹرانزیکشن کے ذریعے 13 لاکھ روپے ادا کیے گئے تھے۔ مسافر نے بتایا کہ اس کا مقصد مذکورہ ایجنٹ کی مدد سے بیرون ملک مزید مواقع تلاش کرنا تھا۔

مسافر کے لیپ ٹاپ کی جانچ پڑتال کے دوران مزید متعدد دستاویزات پی ڈی ایف فارمیٹ میں برآمد ہوئیں، برآمد شدہ دستاویزات میں راولپنڈی بورڈ کے مبینہ سیکنڈری اور ہائر سیکنڈری اسکول سرٹیفکیٹس بھی شامل تھے۔

اسی طرح امریکا کی ایک کمپنی کی جانب سے ڈیجیٹل مارکیٹنگ منیجر کے عہدے کا مبینہ سرٹیفکیٹ اور آئی لیٹس سرٹیفکیٹ بھی برآمد ہوا، لیپ ٹاپ سے سوشل میڈیا اکاؤنٹس، جی میل اکاؤنٹس، پاسپورٹ سے متعلق معلومات اور مختلف یو آر ایل شیٹس بھی برآمد کی گئیں، مذکورہ حقائق کی روشنی میں مسافر کو آف لوڈ کر دیا گیا اور مزید قانونی کارروائی کے لیے ایف آئی اے اینٹی ہیومن ٹریفکنگ سرکل کراچی کے سپرد کردیا گیا۔

اسلام آباد:

کابینہ کی اقتصادی رابطہ کمیٹی (ای سی سی) نے بجلی کے شعبے میں اصلاحات کے جامع پیکیج، گیس پیدا کرنے والے علاقوں کے پانچ کلومیٹر دائرے میں گیس کی فراہمی سمیت مختلف شعبوں کے لیے تکنیکی گرانٹس اور فنڈز کی منظوری دے دی۔

کابینہ کی اقتصادی رابطہ کمیٹی کا اجلاس جمعہ کو وزیر خزانہ محمد اورنگزیب کی زیر صدارت منعقد ہوا۔ اجلاس کے بعد اعلامیہ جاری کردیا گیا۔

اجلاس میں گیس پیدا کرنے والے علاقوں کے پانچ کلومیٹر کے دائرے میں دیہات کو گیس کی فراہمی کے لیے 3 ارب روپے کی منظوری دی گئی، اسکیموں پر عمل درآمد سوئی ناردرن اور سدرن کے ذریعے کیا جائے گا۔

اعلامیے کے مطابق اجلاس میں بی ای سی ایس کے اساتذہ کے بقایاجات کی ادائیگی کے لیے 20 کروڑ روپے کی منظوری دی گئی، عدالتوں کی ہدایات کے مطابق کم از کم اجرت کے فرق کی ادائیگی کی جائے گی۔

مون سون آپریشنز اور بیرون ملک انسانی امداد کے لیے ساڑھے 3 ارب منظور کیے گئے، پاور ڈویژن کے ایس ڈی جیز اچیومنٹ پروگرام کیلئے ایک ارب سے زائد کی گرانٹ منظور ہوئی۔

اعلامیے کے مطابق بجلی کے شعبے میں پیداواری لاگت اور گردشی قرض کم کرنے کے لیے جامع اصلاحاتی پیکیج منظور کرلیے گئے۔ اجلاس میں این ڈی ایم اے کو 3 ارب 63 کروڑ روپے فراہمی کی منظوری دی گئی، فنڈز مون سون 2025ء آپریشن اور امدادی سرگرمیوں کی مد میں دیئے جائیں گے

عالمی توانائی فورم کی رکنیت کے لیے ایک کروڑ 31 لاکھ روپے، گیس پیداوار والے علاقوں کے قریب دیہات کے لیے تین ارب روپے کے منصوبے  منظور کیے گئے، بنیادی ایجوکیشن کمیونٹی اسکولز کے اساتذہ کے واجبات کے لیے 20 کروڑ، ہائر ایجوکیشن کمیشن کے لیے اضافی 40 لاکھ ڈالر فنڈز پر رعایت کی منظوری دے دی گئی۔

پائیدار ترقی پروگرام کے بجلی کے منصوبوں کے لیے ایک ارب 30 کروڑ روپے منظور کرلیے گئے۔ ای سی سی نے بجلی کے شعبے میں اصلاحات کا جامع پیکیج منظور کر لیا۔ اصلاحات سے بجلی پیداوار کی لاگت اور گردشی قرض کم کرنے میں مدد ملے گی۔

سرکاری آگاہی مہم کے بقایا جات کے لیے ایک ارب 47 کروڑ روپے کی منظوری دی گئی ہے، وزارت اطلاعات کو باقی رقم اگلی سہ ماہی میں پیش کرنے کی ہدایت بھی کر دی گئی ہے۔

امریکی وزیر دفاع پیٹ ہیگستھ نے ایران کے ایک اسکول پر ہونے والے ایک مہلک حملے کے بارے میں بی بی سی کے صحافی کے سوال پر روایتی ڈھٹائی کا مظاہرہ کیا۔

عالمی خبر رساں ادارے کے مطابق 28 فروری کو ایران کے جنوبی شہر میں واقع ایک گرلز پرائمری اسکول پر فضائی حملے میں 168 طالبات کی شہادت کی تصدیق ہوئی تھی۔

گزشتہ روز جب پینٹاگون میں امریکی وزیر دفاع میڈیا سے گفتگو کر رہے تھے تو اس دوران بی بی سی کے صحافی نے پوچھا کہ کیا امریکی فوج اس حملے کی ذمہ دار ہے؟ شہری اہداف کو نشانہ بنانے کے الزامات پر آپ کیا کہیں گے؟

اس سوال کے جواب میں امریکی وزیر دفاع پیٹ ہیگستھ نے مختصر ردعمل دیتے ہوئے کہا کہ وہ اس واقعے کے بارے میں صرف اتنا کہہ سکتے ہیں کہ ابھی اس معاملے کی تحقیقات کی جا رہی ہیں۔

جب صحافی نے پوچھا کہ اتنی انٹیلی جنس کے باوجود بھی بچیوں کے اسکول پر بمباری کیسے ہوگئی؟ آپ کے پاس اس وقت کیا معلومات ہیں؟

تو امریکی وزیر دفاع پیٹ ہیگستھ نے صرف اتنا کہ کہ امریکی فوج عام طور پر شہری اہداف کو نشانہ نہیں بناتی تاہم اس خاص واقعے کی تفصیلات کا جائزہ لیا جا رہا ہے۔ فی الوقت میں یہی کہہ سکتا ہوں۔

یاد رہے کہ پرائمری اسکول پر حملے میں 160 سے زائد افراد ہلاک اور درجنوں زخمی ہوگئے جن میں زیادہ تر کم عمر طالبات شامل تھیں۔ حملے کے وقت بچے کلاسوں میں موجود تھے۔

ادھر اقوام متحدہ کے انسانی حقوق کے دفتر نے بھی اس واقعے پر تشویش کا اظہار کرتے ہوئے مطالبہ کیا ہے کہ اس حملے کی مکمل اور شفاف تحقیقات کی جائیں اور ذمہ داروں کا تعین کیا جائے۔

امریکا اور اسرائیل نے اب تک اسکول کو جان بوجھ کر نشانہ بنانے کی تردید کی ہے جبکہ امریکی حکام کا کہنا ہے کہ فضائی کارروائیوں کا مقصد ایران کی فوجی تنصیبات اور میزائل صلاحیتوں کو نشانہ بنانا ہے۔