مشرقِ وسطیٰ میں جاری کشیدگی خطرناک حد تک بڑھ گئی ہے جہاں یمن کے ایران نواز حوثی باغیوں نے پہلی بار اسرائیل پر میزائل حملے کر کے جنگ کا دائرہ مزید وسیع کر دیا ہے۔

دوسری جانب امریکی میڈیا کا کہنا ہے کہ امریکا نے بھی خطے میں اپنی فوجی موجودگی بڑھاتے ہوئے ہزاروں اہلکار تعینات کرنا شروع کر دیے ہیں۔

امریکا ایران میں زمینی کارروائیوں کی تیاری کررہا۔ کارروائیاں کئی ہفتوں پر محیط ہوگی۔ امریکی اخبار نے اپنی رپورٹ میں دعویٰ کیا ہے کہ زمینی کارروائی بڑے پیمانے پر حملے کی صورت میں نہیں ہوگی۔

زمینی کارروائی فوجی دستوں کی چھاپوں کی صورت میں ہوسکتی ہے، اس سے قبل امریکی فوج نے پینتیس سو فوجی بھیجنے کا اعلان کیا تھا۔

رپورٹس کے مطابق ایران کے حمایت یافتہ حوثی نے گزشتہ روز اسرائیل کی جانب میزائل داغے جو اس جاری تنازع کے آغاز کے بعد ان کا پہلا براہ راست حملہ ہے۔ اس پیش رفت نے خطے میں بڑی جنگ کے خدشات کو مزید گہرا کر دیا ہے۔

ادھرامریکا نے فوری ردعمل دیتے ہوئے ہزاروں میرینز مشرقِ وسطیٰ روانہ کر دیے ہیں جن میں سے پہلی کھیپ ایک جنگی بحری جہاز کے ذریعے پہنچ چکی ہے۔

امریکی میڈیا کے مطابق پینٹاگون ایران کے خلاف ممکنہ زمینی کارروائیوں کی تیاری بھی کر رہا ہے، تاہم حتمی فیصلہ صدر ڈونلڈ ٹرمپ کریں گے۔

امریکی وزیر خارجہ مارکو روبیو نے کہا ہے کہ امریکا اپنے اہداف زمینی افواج کے بغیر بھی حاصل کر سکتا ہے، تاہم مزید فوجی تعیناتی صدر کو حکمت عملی میں لچک فراہم کرنے کے لیے کی جا رہی ہے۔

دوسری جانب ایران کے صدر ڈاکٹر مسعود پزشکیان نے وزیراعظم شہباز شریف سے رابطہ کیا ہے جبکہ خطے میں کشیدگی کم کرنے کے لیے اہم سفارتی سرگرمیاں بھی جاری ہیں۔

ادھر عالمی معیشت پر بھی اس جنگ کے گہرے اثرات مرتب ہو رہے ہیں، خاص طور پر توانائی کی ترسیل شدید متاثر ہونے کا خدشہ ہے، جبکہ بحیرہ احمر کے اہم راستے باب المندب پر خطرات بڑھنے سے عالمی تجارت کو بڑا دھچکا لگ سکتا ہے۔

اسی دوران اسرائیلی حملوں میں صحافیوں کی ہلاکت اور طبی مراکز کو نشانہ بنانے کے الزامات نے صورتحال کو مزید سنگین بنا دیا ہے، جس پر عالمی تنظیموں نے شدید ردعمل دیا ہے۔

KHATMANDU:

دنیا کی سیاسی تاریخ میں ایک ایسا دلچسپ اور منفرد واقعہ رونما ہوا ہے جس نے لوگوں کو حیران کر دیا، گانے گا کر اپنے فن کا لوہا منوانے والے ریپر گلوکار نے اپنا گانا وائرل ہونے کے بعد وزیر اعظم بننے کے عہدے کا حلف اٹھایا۔

نیپال میں نوجوان ریپر سے سیاستدان بننے والے بالیندرا شاہ نے شاندار انتخابی کامیابی کے بعد بطور وزیر اعظم حلف اٹھا لیا۔ 35 سالہ رہنما جنہیں بیلن کے نام سے بھی جانا جاتا ہے ملک کے کم عمر ترین وزیراعظم بن گئے ہیں۔

صدر رام چندرا پاؤڈل نے انہیں باضابطہ طور پر وزیراعظم مقرر کیا جب ان کی جماعت راشٹریہ سوتنتر پارٹی نے 275 رکنی پارلیمنٹ میں 182 نشستیں حاصل کر کے واضح اکثریت حاصل کی۔

یہ انتخابات ملک میں بدعنوانی اور بے روزگاری کے خلاف نوجوانوں کی احتجاجی تحریک کے بعد منعقد ہوئے جنہوں نے سابق حکومت کا تختہ الٹ دیا تھا۔

حلف برداری کی تقریب میں بیلن اپنے منفرد انداز میں سیاہ لباس، روایتی ٹوپی اور چشمے پہن کر شریک ہوئے جس نے سوشل میڈیا پر خاصی توجہ حاصل کی۔

تاہم اصل دھماکہ اس وقت ہوا جب انہوں نے حلف سے ایک روز قبل اپنا نیا ریپ سانگ جے مہاکالی جاری کیا جو دیکھتے ہی دیکھتے وائرل ہو گیا۔

گانے میں وہ عوام کو امید اور خوشحالی کا پیغام دیتے نظر آئے جبکہ ویڈیو میں انتخابی مہم کے مناظر اور عوام کا جوش بھی دکھایا گیا ہے۔ اس ویڈیو کو چند ہی گھنٹوں میں لاکھوں افراد دیکھ چکے ہیں۔

نئے وزیراعظم کے انتخاب پر چین نے بھی مبارکباد دی ہے اور نیپال کی خودمختاری کے لیے حمایت جاری رکھنے کا اعلان کیا ہے۔ تجزیہ کاروں کے مطابق یہ کامیابی نوجوانوں کی طاقت اور روایتی سیاست کے خلاف ایک واضح پیغام ہے۔

حیدرآباد:

حیدرآباد میں پولیس نے چند گھنٹوں کے دوران دو مختلف مبینہ مقابلوں میں دو ملزمان کو زخمی حالت میں گرفتار کر لیا جبکہ ان کے دو ساتھی فرار ہونے میں کامیاب ہو گئے۔ پولیس کے مطابق دونوں کارروائیاں جرائم پیشہ عناصر کے خلاف کی گئیں۔

پہلا واقعہ نسیم نگر کے علاقے میں آئی کون سٹی کے قریب پیش آیا، جہاں پولیس نے موٹر سائیکل سوار مشتبہ افراد کو رکنے کا اشارہ کیا۔

پولیس کے مطابق ملزمان نے رکنے کے بجائے فائرنگ شروع کر دی جس پر پولیس نے جوابی کارروائی کی۔

 فائرنگ کے تبادلے میں ایک ملزم زخمی حالت میں گرفتار کر لیا گیا جبکہ اس کا ساتھی اندھیرے کا فائدہ اٹھاتے ہوئے فرار ہو گیا۔

گرفتار ملزم کی شناخت مظہر علی بھٹی کے نام سے ہوئی ہے جس کے قبضے سے غیر قانونی اسلحہ برآمد ہوا۔

پولیس کے مطابق ملزم ماضی میں بھی 26 سے زائد مقدمات میں ملوث رہ چکا ہے۔

زخمی ملزم کو فوری طور پر سول اسپتال منتقل کر دیا گیا جبکہ فرار ملزم کی گرفتاری کے لیے چھاپے مارے جا رہے ہیں۔

دوسرا مقابلہ ٹنڈو یوسف روڈ پر پیش آیا، جہاں پولیس نے واردات کی نیت سے گھومنے والے دو موٹر سائیکل سوار ملزمان کا تعاقب کیا۔

پولیس کو دیکھتے ہی ملزمان نے فرار ہونے کی کوشش کی اور فائرنگ کا تبادلہ ہوا جس کے نتیجے میں ایک ملزم زخمی حالت میں گرفتار کر لیا گیا جبکہ اس کا ساتھی موقع سے فرار ہو گیا۔

گرفتار ملزم کی شناخت اویس عرف بھٹو ہزارے وال کے نام سے ہوئی ہے، جس کے قبضے سے 30 بور پستول برآمد ہوا۔

پولیس کے مطابق گرفتار اور فرار ملزمان کا تعلق ڈکیتی، موٹر سائیکل چوری اور منشیات فروشی جیسے جرائم سے ہے اور ان کے خلاف مختلف تھانوں میں متعدد مقدمات درج ہیں۔ پولیس نے فرار ملزمان کی گرفتاری کے لیے کارروائیاں تیز کر دی ہیں۔