گورنر خیبر پختونخوا فیصل کریم کنڈی اور گورنر پنجاب سردار سلیم حیدر کی پیڈل ٹینس کھیلتے ہوئے ویڈیو وائرل ہوگئی۔

تفصیلات کے مطابق گورنر خیبر پختونخوا اور گورنر پنجاب کے درمیان پیڈل ٹینس کا دوستانہ میچ لاہور کے ایک نجی اسپورٹس کلب میں کھیلا گیا۔

دونوں گورنرز کے درمیان سنسنی خیز مقابلہ دیکھنے کو ملا۔ مقابلے میں دونوں جانب سے زبردست کھیل کا مظاہرہ کیا گیا۔

میچ میں سلیم حیدر کا ساتھ صحافی علی فرقان جبکہ فیصل کنڈی کا ساتھ لیگی رہنما ذیشان نقوی نے دیا۔

اس موقع پر دونوں گورنرز نے عوام کو پیغام دیا کہ پیڈل ٹینس، فٹنس، تفریح اور رابطے کا بہترین ذریعہ ہے، صحت مند سرگرمیاں، مضبوط معاشرہ۔

گورنر خیبر پختونخوا فیصل کریم کنڈی نے کہا کہ پیڈل ٹینس صحت مند سرگرمیوں کے فروغ کی بہترین مثال ہے، کھیلوں کے فروغ سے معاشرے میں مثبت رجحانات پیدا ہوتے ہیں۔

فیصل کریم کنڈی کا کہنا تھا کہ پیڈل ٹینس نہ صرف فٹنس بلکہ ذہنی سکون کا بھی ذریعہ ہے۔ نوجوانوں کو کھیلوں کی طرف راغب کرنا وقت کی ضرورت ہے، کھیل انسان کو متحرک اور پرجوش رکھتا ہے۔

گورنر پنجاب سردار سلیم حیدر نے کہا کہ پیڈل ٹینس تیزی سے مقبول ہوتا ہوا جدید کھیل ہے، یہ ہر عمر کے افراد کے لیے موزوں کھیل ہے۔

سردار سلیم حیدر نے مزید کہا کہ صحت مند معاشرے کے لیے کھیلوں کا فروغ ناگزیر ہے، نوجوان نسل کو اسپورٹس میں آگے آنا چاہیے۔ کھیلوں سے ٹیم ورک اور نظم و ضبط سیکھنے کو ملتا ہے۔

پاکستان کے معروف گلوکار اور اداکار علی ظفر نے ساتھی گلوکارہ میشا شفیع کے خلاف ہتکِ عزت کے مقدمے میں کامیابی حاصل کرنے کے بعد اپنے جذبات کا اظہار کرتے ہوئے اللہ تعالیٰ کا شکر ادا کیا ہے۔

علی ظفر نے اپنی انسٹاگرام پوسٹ میں لکھا کہ ایک طویل اور صبر آزما قانونی مرحلے کے بعد انہیں بالآخر انصاف ملا ہے۔

یہ کیس تقریباً آٹھ سال تک جاری رہا، جس کا فیصلہ 31 مارچ کو سامنے آیا۔ عدالت نے اپنے فیصلے میں قرار دیا کہ میشا شفیع نہ تو متعدد پیشیوں پر عدالت میں حاضر ہوئیں اور نہ ہی وہ اپنے الزامات کے حق میں مضبوط شواہد پیش کرسکیں، جبکہ علی ظفر کی جانب سے تمام گواہان عدالت میں پیش کیے گئے، جس کے بعد فیصلہ ان کے حق میں سنایا گیا۔

اپنی قانونی کامیابی کے دو روز بعد علی ظفر نے انسٹاگرام پر ایک پوسٹ کے ذریعے اس معاملے پر اپنی خاموشی توڑتے ہوئے کہا کہ وہ اللہ کے شکر گزار ہیں اور ان تمام افراد کے بھی مشکور ہیں جنہوں نے مشکل وقت میں ان کا ساتھ دیا اور سچ کا دفاع کیا۔

انہوں نے واضح کیا کہ وہ اس کامیابی کو کسی جشن کے طور پر نہیں دیکھتے بلکہ ان کے دل میں عاجزی اور شکرگزاری کے جذبات ہیں۔ علی ظفر کے مطابق ان کے لیے اصل خوشی انصاف کے ملنے کی ہے، نہ کہ کسی کے خلاف جیت کا احساس۔

اپنے پیغام میں انہوں نے مزید کہا کہ وہ کسی کے خلاف منفی جذبات نہیں رکھتے اور ان کے نزدیک یہ معاملہ اب اپنے اختتام کو پہنچ چکا ہے۔ انہوں نے دعا کی کہ سب لوگ وقار اور سکون کے ساتھ آگے بڑھیں۔

یاد رہے کہ لاہور کی ایک عدالت نے منگل کو فیصلہ سناتے ہوئے میشا شفیع کو 50 لاکھ روپے ہرجانہ ادا کرنے کا حکم دیا تھا۔ یہ کیس 2018 میں اس وقت شروع ہوا جب میشا شفیع نے علی ظفر پر ہراسانی کے الزامات عائد کیے، جس کے بعد علی ظفر نے ان کے خلاف ہتکِ عزت کا دعویٰ دائر کیا تھا۔ یہ مقدمہ پاکستان کے نمایاں ترین ’می ٹو‘ کیسز میں شمار کیا جاتا ہے۔