ابوظبی: متحدہ عرب امارات میں حالیہ کشیدگی کے دوران ایک اور پاکستانی شہری جاں بحق ہو گیا، جس کے بعد مرنے والے پاکستانیوں کی تعداد تین ہو گئی ہے۔

اماراتی حکام کے مطابق فضائی دفاعی نظام نے بیلسٹک میزائل حملے کو ناکام بنایا، تاہم ابوظبی کے علاقے بنی یاس میں میزائل کے ملبے کے گرنے سے ایک پاکستانی شہری جان کی بازی ہار گیا۔

رپورٹس کے مطابق حالیہ حملوں میں امارات میں مجموعی طور پر 7 افراد جاں بحق ہو چکے ہیں۔ ان میں تین پاکستانی شہری شامل ہیں، جن میں ایک دبئی جبکہ دو ابوظبی میں جاں بحق ہوئے۔

حکام کا کہنا ہے کہ حملوں کے بعد سیکیورٹی اقدامات مزید سخت کر دیے گئے ہیں، جبکہ شہریوں سے احتیاطی تدابیر اختیار کرنے کی اپیل کی گئی ہے۔

لندن: ایران سے جاری کشیدگی اور جنگ کے باعث برطانوی معیشت پر منفی اثرات پڑنے کا خدشہ ظاہر کیا جا رہا ہے، جس کے نتیجے میں ایک لاکھ سے زائد افراد کے بے روزگار ہونے کا امکان ہے۔

میڈیا رپورٹس کے مطابق ماہرین کا کہنا ہے کہ جنگ کے تسلسل سے برطانیہ میں معاشی دباؤ بڑھ سکتا ہے اور معیشت کی بحالی متاثر ہو سکتی ہے۔

اس سے قبل توقع کی جا رہی تھی کہ رواں سال شرح سود میں دو مرتبہ کمی سے معیشت کو سہارا ملے گا، تاہم موجودہ صورتحال میں یہ امکانات کم ہوتے دکھائی دے رہے ہیں۔

رپورٹ کے مطابق برطانیہ میں بے روزگاری کی شرح پہلے ہی پانچ سال کی بلند ترین سطح یعنی 5.2 فیصد تک پہنچ چکی ہے۔ ماہرین کا کہنا ہے کہ اگر جنگ مزید تین ماہ جاری رہی تو یہ شرح بڑھ کر 5.5 فیصد تک جا سکتی ہے۔

ماہرِ اقتصادیات کیمز اسمتھ کے مطابق توانائی کی بڑھتی ہوئی قیمتوں کے باعث کاروباری اداروں پر دباؤ بڑھے گا، جس کے نتیجے میں ملازمین کو جبری چھٹیوں کا سامنا کرنا پڑ سکتا ہے۔

انہوں نے مزید کہا کہ غیر یقینی صورتحال کے باعث کمپنیاں نئی بھرتیاں روک سکتی ہیں، جس سے روزگار کے مواقع مزید محدود ہو جائیں گے۔