پاکستان کی اعلیٰ قیادت وزیر اعظم شہباز شریف اور فیلڈ مارشل عاصم منیر کی کاوشوں سے امریکا اور ایران کے درمیان بڑے تصادم کو روکنے کی کامیاب کاوشوں کے بعد دونوں ممالک کی جانب سے مختلف دعوے کیے جا رہے ہیں۔

امریکی صدر ڈونلڈ ٹرمپ نے دو ہفتے کی جنگ بندی پر جہاں اپنی کامیابی کے ڈھنڈورے پیٹے تو وہیں انہوں نے ایرانی وزیر خارجہ عباس عراقچی کا سرکاری بیان بھی اپنے سوشل میڈیا اکاؤنٹ ٹروتھ سوشل پر شیئر کیا۔ 

جس میں انہوں نے شہباز شریف اور فیلڈ مارشل عاصم منیر کو کامیاب سفارتکاری اور مشرق وسطیٰ کو بحران سے بچانے میں اہم کردار ادا کرنے پر زبردست خراج تحسین پیش کیا۔

ٹروتھ سوشل پر صدر ٹرمپ کے اکاؤنٹ سے شیئر ہونے والے اس بیان میں ایرانی وزیر خارجہ سید عباس عراقچی نے پاکستان کے وزیراعظم شہباز شریف اور فیلڈ مارشل عاصم منیر کی خطے میں جنگ کے خاتمے کے لیے کوششوں کو سراہتے ہوئے ان کا شکریہ ادا کیا۔

بیان کے مطابق وزیراعظم شہباز شریف کی درخواست اور امریکہ کی جانب سے 15 نکاتی مذاکراتی تجویز کے تناظر میں امریکی صدر ڈونلڈ ٹرمپ کی جانب سے ایران کی 10 نکاتی تجویز کو مذاکرات کی بنیاد کے طور پر قبول کرنے کے اعلان کے بعد ایران نے یہ مؤقف اختیار کیا ہے۔

ایران نے واضح کیا ہے کہ اگر اس کے خلاف حملے بند کیے جاتے ہیں تو اس کی مسلح افواج دفاعی کارروائیاں روک دیں گی۔

مزید یہ کہ دو ہفتوں کے لیے آبنائے ہرمز سے محفوظ گزرگاہ ایران کی مسلح افواج کے ساتھ رابطہ اور تکنیکی حدود کو مدنظر رکھتے ہوئے ممکن ہوگی۔

ایران کے مطابق یہ اقدامات خطے میں کشیدگی کم کرنے اور مذاکرات کے ذریعے مسائل کے حل کی جانب ایک قدم ہیں۔

شہر قائد میں مختلف تھانوں کی پولیس نے مبینہ مقابلوں کے دوران ایک ڈاکو کو ہلاک جبکہ 5 کو زخمی حالت میں گرفتار کر لیا۔ گرفتار و ہلاک ملزمان سے اسلحہ، موبائل فون، نقدی اور موٹرسائیکلیں برآمد کی گئیں۔

تفصیلات کے مطابق ابراہیم حیدری پولیس نے ریڑھی روڈ اکبر شاہ چڑھائی کے قریب مبینہ مقابلہ کیا جس کے دوران ایک ڈاکو زخمی حالت میں گرفتار ہوا۔

زخمی ملزم کو طبی امداد کے لیے جناح اسپتال منتقل کیا گیا جہاں اس کی شناخت 18 سالہ یونس کے نام سے ہوئی۔

پولیس کے مطابق ملزم سے اسلحہ اور دیگر سامان برآمد ہوا۔

دوسری جانب سعیدآباد پولیس نے سیکٹر فور اے میں کارروائی کے دوران مبینہ مقابلے میں ایک ڈاکو کو ہلاک کر دیا جبکہ اس کا ایک ساتھی فرار ہونے میں کامیاب ہوگیا۔

ہلاک ڈاکو کی لاش سول اسپتال منتقل کی گئی جہاں اس کی شناخت بلال کے نام سے ہوئی۔

پولیس کے مطابق ملزم سے پستول بمعہ گولیاں، موبائل فون، نقد رقم اور موٹرسائیکل برآمد ہوئی۔

اسی طرح اسٹیل ٹاؤن پولیس نے ٹیلفون ایکسچینج کے قریب مبینہ مقابلے کے بعد دو ڈاکوؤں کو زخمی حالت میں گرفتار کیا۔

دونوں زخمی ملزمان کو جناح اسپتال منتقل کیا گیا جن کی شناخت غلام مصطفیٰ اور علی شان کے ناموں سے ہوئی۔

پولیس نے ان کے قبضے سے دو پستولیں، موبائل فونز، نقد رقم اور موٹرسائیکل برآمد کر لی۔

ڈیفنس کے علاقے قیوم آباد سی آر پٹہ چرچ کے قریب پولیس نے مبینہ مقابلے کے بعد 3 ڈاکوؤں کو گرفتار کر لیا جن میں سے دو زخمی حالت میں جبکہ ایک کو موقع پر ہی قابو کر لیا گیا۔

زخمی ڈاکوؤں کی شناخت رضا علی اور رمضان کے ناموں سے ہوئی جنہیں اسپتال منتقل کیا گیا جبکہ تیسرا ملزم راجو کو تھانے منتقل کر دیا گیا۔

پولیس کے مطابق گرفتار ملزمان سے دو پستولیں، موبائل فونز، نقد رقم اور موٹرسائیکلیں برآمد کی گئیں۔