اسلام آباد:

ترجمان دفتر خارجہ نے کہا ہے کہ بلوچستان میں دہشت گردی کے واقعے کے بعد بھارتی بیان پاکستانی مؤقف کی تصدیق ہے۔

صحافیوں کوہفتہ وار بریفنگ میں ترجمان دفتر خارجہ طاہر حسین اندرابی نے بتایا کہ وزیر اعظم نے 23 تا 24 فروری امیر قطر کی دعوت پر قطر کا دورہ کیا۔ امیر قطر نے پاکستان کے ساتھ اقتصادی شراکت داری کو اعلی سطح تک لے جانے کی خواہش کا اظہار کیا۔ قطر کے وزیر دفاع اور وزیر مملکت نے بھی وزیراعظم سے ملاقات کی۔

انہوں نے بتایا کہ نائب وزیراعظم اسحاق ڈار سعودی عرب کا دورہ کر رہے ہیں، جہاں وہ جدہ میں او آئی سی ایگزیکٹو کمیٹی کے غیرمعمولی وزارتی اجلاس میں شرکت کریں گے۔ او آئی سی کا ہنگامی وزارتی اجلاس 26 فروری کو جدہ میں منعقد ہو رہا ہے ، جس میں اسرائیلی قابض حکام کے غیرقانونی فیصلوں پر غور کیا جائے گا۔

طاہر حسین اندرابی کا کہنا تھا کہ اسحاق ڈار مقبوضہ مغربی کنارے کو نام نہاد ریاستی اراضی میں تبدیل کرنے کے اسرائیلی اقدامات پر پاکستان کا مؤقف پیش کریں گے۔ علاوہ ازیں وزارتی اجلاس کے موقع پر اسحاق ڈار او آئی سی رکن ممالک کے وزرائے خارجہ سے دوطرفہ ملاقاتیں بھی کریں گے۔

انہوں نے کہا کہ رواں ماہ سمجھوتا ایکسپریس پر حملے کی 19ویں برسی ہے۔ اس حملے میں 70 سے زائد قیمتی جانیں ضائع ہوئیں۔ حملے میں ملوث سوامی آسیم آنند نے عوامی سطح پر اپنے جرم کا اعتراف کیا۔ بھارتی کرنل پروہت نے بھی اپنے جرم کا اعتراف کیا۔

ترجمان دفتر خارجہ کا کہنا تھا کہ سمجھوتا ایکسپریس میں ملوث چاروں مجرم آزاد پھر رہے ہیں۔ بھارت سمجھوتا ایکسپریس میں ملوث مجرموں کو انصاف کے کٹہرے میں نہیں لا سکا۔

انہوں نے کہا کہ بھارتی وزارت خارجہ امور کے بیان کو سختی سے مسترد کرتے ہیں۔ بلوچستان میں دہشت گرد حملے کے بعد بھارتی وزارت خارجہ کا بیان پاکستان کی موقف کی تصدیق ہے۔

راولپنڈی:

تھانہ جاتلی کے علاقے گورسیاں میں زمین کی خاطر  اکلوتے بیٹے نے بوڑھے والدین پر  بہیمانہ تشدد کیا اور ان کے ساتھ بدسلوکی کی۔

بیٹے کے مظالم سے دل برداشتہ ضعیف والدین کا ویڈیو بیان وائرل  ہوگیا، جس کے سامنے آنے پر سی پی او راولپنڈی خالد ہمدانی نے نوٹس  لیتے ہوئے ایس ایچ او جاتلی جمال نواز کو مقدمہ درج کرکے ملزم کو فوری گرفتار کرنے کا حکم  دیا۔

بعد ازاں جاتلی پولیس نے ناخلف ملزم بیٹےمحمد اخلاق کو گرفتار کرلیا ۔

متاثرہ خاتون مسماۃ خالدہ نور نے  کہا کہ میں ایک گھریلو خاتون ہوں، ایک بیٹا محمد اخلاق ہے اور ایک بیٹی تھی   جوفوت ہوچکی ہے  ۔  بیٹا محمد اخلاق مجھ پر اور میرے خاوند نور حسن پر آئے روز تشدد کرتا ہے ۔ تمام پیسے اور بیٹی کا زیور بھی چھین لیا۔ بہو پستول سر پر لے کر کھڑی رہی۔

انہوں نے بتایا کہ ہمیں 2 دن تک گھر کے کمرے میں بند رکھا گیا، پھر تیسرے دن  ہم دونوں کو گھر سے نکال دیا ، اب ہم کسی اور کے گھر میں رہ رہے ہیں۔ بیٹا دھمکی دیتا ہے اور کہتا ہے زمین میری بیوی کے نام کرو، ورنہ مجھ سے مار کھاتے رہو گے جبکہ میرے خاوند نے  زمین مسجد کے لیے دے رکھی ہے، جس کا میرے بیٹے کو رنج ہے۔

والدہ نے کہا کہ ہمارے بیٹے نے ہم پر تشدد کرکے  کمرے میں بند رکھ کر اور زمین اپنی بیوی کے نام کرانے کے لیے دھمکیاں دے کر سخت زیادتی کی ہے ۔ بیٹے کے خلاف قانونی کارروائی کرکے ہماری داد رسی کی جائے۔

دوسری جانب جاتلی پولیس نے فوری کارروائی کرتے ہوئے والدین پر تشدد کرکے گھر سے نکالنے اور جان سے مارنے کی دھمکیاں دینے والے ناخلف بیٹے کو گرفتار کرلیا ہے۔

ایس پی صدر انعم شیر کا کہنا ہے کہ زیر حراست شخص کو قرار واقعی سزا دلوانے کے لیے تمام قانونی تقاضے پورے کیے جائیں گے۔ والدین پر تشدد یا ناروا سلوک افسوس ناک ہے۔