امریکا نے دعویٰ کیا ہے کہ ایران پر حالیہ بمباری کے بعد آبنائے ہرمز کو خطرے میں ڈالنے کی ایرانی صلاحیت کمزور ہو گئی.

عالمی خبر رساں ادارے کے مطابق امریکی فوج نے دعویٰ کیا ہے کہ اس ہفتے ایک زیر زمین فوجی تنصیب کو نشانہ بنایا جہاں ایران کروز میزائل اور دیگر ہتھیار ذخیرہ کرتا تھا جس سے ایران کی عسکری صلاحیت کو نقصان پہنچا ہے۔

علاوہ ازیں امریکا نے ایران کے مرکزی جوہری تنصیب نطنز پر بھی حملہ کیا اور اسرائیلی فوج نے تہران میں رات کے دوران بڑے پیمانے پر فضائی حملے کیے اور درجنوں اہداف کو نشانہ بنایا۔

امریکا نے دعویٰ کیا ہے ان حملوں کے نتیجے میں ایران کی عسکری قوت میں کمی آئی ہے اور آبنائے ہرمز میں ایران کی گرفت کمزور ہوتی جا رہی ہے۔

یاد رہے کہ اس سے قبل امریکا نے نیٹو اتحادی ممالک سے اپیل کی تھی کہ آبنائے ہرمز پر ایران کیخلاف فوجی آپریشن کے لیے آگے آئیں کیوں کہ ان ممالک سے فوجی کارروائیاں آسان ہیں۔

صدر ٹرمپ نے شکوہ کیا تھا کہ ان کی اپیل کے باوجود کسی نیٹو ملک نے ساتھ نہ دیا اور اب امریکا کو بھی کسی کی مدد کی ضرورت نہیں ہے۔

آبنائے ہرمز کی بندش سے دنیا بھر میں پیٹرول کی ترسیل شدید متاثر ہوئی ہے اور قیمتیں آسمان سے باتیں کرنے لگی ہیں۔

ایران نے 3600 کلومیٹر کی دوری پر واقع امریکا اور برطانیہ کے ایک مشترکہ فوجی اڈے ڈیاگو گارشیا ایئربیس کو نشانہ بناکر سب کو حیران کردیا ہے۔

بحرِ ہند کے وسط میں واقع ڈیاگو گارشیا ایئربیس امریکا اور برطانیہ کا ایک نہایت اہم فوجی اڈہ ہے، جو کئی دہائیوں سے عالمی فوجی آپریشنز میں مرکزی کردار ادا کرتا آ رہا ہے۔

ڈیاگو گارشیا کہاں واقع ہے؟

ڈیاگو گارشیا جزائر چاگوس کا حصہ ہے جو بحرِ ہند میں بھارت کے جنوبی کنارے سے دور ایک دور دراز جزیرہ نما سلسلہ ہے۔ یہ علاقہ 1814 سے برطانیہ کے کنٹرول میں ہے اور اسے برطانوی بحرِ ہند علاقہ (British Indian Ocean Territory) کہا جاتا ہے۔

فوجی اہمیت

ڈیاگو گارشیا کی جغرافیائی پوزیشن اسے مشرقِ وسطیٰ، جنوبی ایشیا اور افریقہ میں فوجی کارروائیوں کے لیے ایک اسٹریٹجک مرکز بناتی ہے۔اس ایئربیس پر تقریباً 2,500 اہلکار تعینات ہیں، جن میں اکثریت امریکی فوجیوں کی ہے۔

امریکا یہ فوجی اڈہ کئی بڑی جنگی کارروائیوں میں استعمال کرچکا ہے جن میں ویتنام،عراق، افغانستان اور یمن میں حوثی باغیوں کے خلاف فوجی کارروائیاں شامل ہیں۔

برطانیہ، امریکا اور ماریشس کے درمیان تنازع

ڈیاگو گارشیا اس وقت ایک سیاسی تنازع کا بھی مرکز ہے۔ برطانیہ حکومت جزائر چاگوس کی خودمختاری ماریشس کو منتقل کرنے کا منصوبہ رکھتی ہے جس کے بعد وہ اس ایئربیس کو دوبارہ لیز پر لے گا۔

برطانوی وزیرِ اعظم کیئر اسٹارمز کا کہنا ہے کہ یہ اقدام اڈے کے مستقبل کو محفوظ بنانے کے لیے ضروری ہے، کیونکہ اس پر قانونی چیلنجز کا خطرہ موجود ہے۔

تاہم امریکی صدر ڈونلڈ ٹرمپ نے اس منصوبے پر تنقید کرتے ہوئے اسے “انتہائی احمقانہ اقدام” قرار دیا۔ اگرچہ ابتدائی طور پر امریکی حکومت نے اس تجویز کا خیرمقدم کیا تھا، لیکن بعد میں اس پر اختلافات سامنے آئے۔

عالمی اہمیت

ڈیاگو گارشیا نہ صرف ایک فوجی اڈہ ہے بلکہ یہ بحرِ ہند میں طاقت کے توازن کا اہم مرکز، امریکی عالمی فوجی حکمتِ عملی کا کلیدی حصہ اور مشرقِ وسطیٰ سمیت ایشیا میں فوری فوجی رسپانس کے لیے استعمال ہوتا ہے۔