حکومت نے آئی ایم ایف کی ایک اور شرط پوری کرنے کے لیے گندم کے بعد شوگر سیکٹر کو بھی ڈی ریگولیٹ کرنے کا اصولی فیصلہ کیا ہے جس کے لیے ڈی ریگولائزیشن پلان تیار کرکے منظوری کے لیے وزیراعظم کو پیش کردیا گیا ہے۔

ذرائع کے مطابق شوگر ملز کے لائسنس، امپورٹ اور ایکسپورٹ سمیت ہر شعبہ ڈی ریگولیٹ ہوگا، شوگر سیکٹر کو ڈی ریگولیٹ کرنے پر پنجاب، کے پی، بلوچستان نے آمادگی ظاہر کردی ہے سندھ کی سفارشات موصول ہونا باقی ہیں۔

وزارت صنعت و پیداوار کے پیش کردہ پلان میں کسانوں کے تحفظ اور کارٹلائزیشن کی روک تھام کیلئے ریگولیٹری اتھارٹی بنانے کی تجویز شامل ہے، کسانوں کو گنا کاشت کرنے کی مکمل آزادی ہوگی، کسی زون یا اقسام کی پابندی نہیں ہوگی،کسان کسی بھی شوگر مل کو گنا فروخت کرنے یا گڑ بنانے میں آزاد ہوگا۔

گنے کی قیمت کا تعین مارکیٹ کرے گی، آٹھ ماہ بند رہنے والی شوگر ملز باہر سے خام مال منگوا کر چینی بنا سکیں گی۔ حکومت چینی کی برآمد پر کوئی سبسڈی نہیں دے گی ملک میں نئی شوگر مل لگانے پر پابندی بھی ختم کر دی جائے گی۔

کسانوں کو نقصان کے لیے ممنوعہ گنے کی اقسام کی فہرست بوائی سے قبل جاری کرنے کی تجویز ہے، شوگر ملز کو باہر سے خام مال منگوا کر چینی تیار کر کے برآمد کرنے کی اجازت ہوگی۔

وزیراعلیٰ سندھ سید مراد علی شاہ کی زیر صدارت گل پلازہ آتشزدگی متاثرین کے معاوضے کی ادائیگی سے متعلق اجلاس میں اہم فیصلے کیے گئے۔

جاں بحق افراد کے لواحقین کے لیے 85 کروڑ روپے مختص کیے گئے، فی خاندان ایک کروڑ روپے معاوضہ دینے کا فیصلہ کیا گیا، 72 میں سے 61 متاثرہ خاندانوں کو گھروں پر چیک کے ذریعے ادائیگی مکمل کرلی گئی۔

متاثرہ تاجروں کے لیے 60 کروڑ روپے مختص، فی دکاندار 5 لاکھ روپے امداد فراہم کرنے کا فیصلہ، اب تک 843 دکانداروں کو امداد فراہم کردی گئی۔

دکانوں کی تعداد 1184 سے بڑھ کر 1209 ہونے پر حتمی فہرست بنانے کی ہدایت کی گئی۔

وزیراعلیٰ سندھ نے کہا کہ تصدیقی عمل تیز کیا جائے، نادرا سے رابطہ فوری کیا جائے، مستحقین کو شفاف اور بروقت ادائیگی یقینی بنائی جائے،ایک شخص کی متعدد دکانوں کے معاملے پر واضح پالیسی بنائی جائے، ایس بی سی اے کو گل پلازہ کی ازسرنو تعمیر کا منصوبہ پیش کرنے کا حکم دیا گیا۔

وزیراعلیٰ سندھ نے کہا کہ متاثرہ خاندانوں اور تاجروں کو ہر ممکن ریلیف دیا جائے گا اور انصاف یقینی بنایا جائے گا۔