اسرائیل اور امریکی حملوں کے جواب میں کے ایران خلیجی ممالک کو نشانہ بنا رہا ہے اور آج بھی یہ سلسلہ جاری رہا۔

عالمی خبر رساں ادارے کے مطابق متحدہ عرب امارات میں گیس پلانٹ پر خوفناک آگ بھڑک اُٹھی جس میں ایک مصری شہری جاں بحق جبکہ 2 پاکستانی اور 2 مصری زخمی ہوگئے۔

حکام نے دعویٰ کیا ہے کہ ایرانی حملے میں میزائل کو فضا میں ہی ناکارہ بنادیا گیا تاہم جلتے ہوئے ملبے کے ٹکڑے گیس پلانٹ پر گرے جس آگ بھڑک اُٹھی۔

اماراتی حکام نے مزید بتایا کہ آگ پر قابو پالیا گیا اور زخمیوں کو اسپتال منتقل کردیا گیا جہاں ان کی حالت خطرے سے باہر بتائی جا رہی ہے۔

ایک اور رپورٹ کے مطابق متحدہ عرب امارات کے گیس پلانٹ پر گرنے والے میزائل کے ٹکروں اور ملبے سے 12 افراد زخمی ہوئے۔

کویت میں بھی آج صورتحال دن بھر کشیدہ رہی، جہاں متعدد بار ایئر ریڈ سائرن بجائے گئے جب کہ الاحمدی ریفائنری کے مختلف یونٹس میں لگنے والی آگ پر کئی گھنٹوں بعد قابو پالیا گیا۔

دوسری جانب سعودی عرب نے بھی متعدد میزائل اور ڈرون حملوں کو فضا میں ہی تباہ کرنے کا دعویٰ کیا ہے، جبکہ بحرین میں بھی صبح سے شام تک ایئر ریڈ وارننگز جاری رہیں۔

مسلسل حملوں کے باعث خلیجی تعاون کونسل کے تقریباً تمام ممالک کسی نہ کسی حد تک متاثر ہوئے ہیں، جس سے خطے میں سیکیورٹی خدشات اور کشیدگی میں مزید اضافہ ہو گیا ہے۔

ایران میں گرائے گئے امریکی طیارے میں پائلٹ اور معاون پائلٹ موجود تھے جن میں سے ایک تاحال لاپتا ہے۔

امریکی نشریاتی ادارے سی این این نے اپنی رپورٹ میں انکشاف کیا ہے کہ ایران میں گرائے گئے امریکی لڑاکا طیارے کے ایک پائلٹ کو امریکی فورسز نے بازیاب کرا لیا۔

سی این این کو یہ اہم معلومات امریکا کے تین باخبر ذرائع نے دیں۔ جن کا کہنا ہے کہ بازیاب ہونے والا پائلٹ اس وقت امریکی تحویل میں ہے اور اس کی حالت خطرے سے باہر ہے۔

رپورٹ کے مطابق طیارے میں موجود دوسرے رکن کے بارے میں تاحال کوئی واضح معلومات سامنے نہیں آئی ہیں۔ تلاش کا کام تاحال جاری ہے۔

خیال رہے کہ امریکی ذرائع نے یہ بھی تصدیق کی ہے کہ تباہ ہونے والا طیارہ F-15E Strike Eagle تھا جو ایک جدید لڑاکا طیارہ ہے اور فضا سے فضا اور فضا سے زمین دونوں قسم کے حملے کرنے کی صلاحیت رکھتا ہے۔

عام طور پر اس طیارے میں دو افراد سوار ہوتے ہیں جن میں ایک پائلٹ جبکہ دوسرا ویپن سسٹمز آفیسر ہوتا ہے جو ہتھیاروں اور ٹارگٹنگ سسٹم کو کنٹرول کرتا ہے۔

واضح رہے کہ ایران نے دعویٰ کیا تھا کہ اس نے 24 گھنٹوں میں 2 امریکی جنگی طیارے F-35 کو مار گرایا ہے تاہم امریکا نے ایک F-15E کے مار گرائے جانے کی تصدیق کی ہے۔