قومی احتساب بیورو (نیب) نے گزشتہ تین سالوں کے دوران اپنی تاریخ کی سب سے بڑی ریکوری کا دعویٰ کرتے ہوئے 115 کھرب روپے سے زائد رقم واپس لانے کا انکشاف کیا ہے۔

یہ تفصیلات سینیٹ کی قائمہ کمیٹی برائے قانون و انصاف میں پیش کی گئی نیب کی کارکردگی اور اصلاحات سے متعلق رپورٹ میں سامنے آئیں۔

رپورٹ کے مطابق ادارے پر خرچ ہونے والے ہر ایک روپے کے بدلے 629 روپے قومی خزانے میں واپس آئے۔

دستاویزات میں بتایا گیا کہ نیب نے 48 لاکھ 50 ہزار ایکڑ سرکاری زمین واگزار کروا کر تقریباً 110 کھرب روپے کی قومی بچت ممکن بنائی۔

مزید برآں ہاؤسنگ سوسائٹیز میں متاثر ہونے والے 1 لاکھ 29 ہزار افراد کے 213 ارب روپے واپس دلائے گئے، جبکہ منی لانڈرنگ کے خلاف کارروائیوں میں 85 ارب 40 کروڑ روپے کے اثاثے منجمد کیے گئے۔

رپورٹ میں احتساب کے نظام میں موجود رکاوٹوں کی نشاندہی بھی کی گئی، جس کے مطابق 50 کروڑ روپے سے کم مالیت کے کرپشن کیسز پر کارروائی نہ ہونا ایک بڑی مشکل ہے۔

نیب نے تجویز دی ہے کہ کرپشن کیسز میں ملزم کے ذاتی فائدے کو ثابت کرنے کی شرط ختم کی جائے اور صرف قومی خزانے کو نقصان پہنچانے پر سزا دی جائے۔

دستاویزات کے مطابق 100 سے کم متاثرین والے فراڈ کیسز اب نیب کے دائرہ اختیار سے باہر ہیں، جبکہ 100 متاثرین کے بیانات ریکارڈ کرنے کی شرط مقدمات میں تاخیر کی بڑی وجہ ہے۔

رپورٹ میں بتایا گیا کہ احتساب عدالتوں میں ایک ریفرنس کے فیصلے میں اوسطاً 6 سال لگتے ہیں، جبکہ ملک بھر میں 23 میں سے صرف 16 عدالتیں فعال ہیں۔

نیب نے کفایت شعاری مہم کے تحت 238 آسامیاں ختم کر کے 66 کروڑ روپے کا بجٹ بھی واپس کیا۔

سال 2025 میں نیب کے 58 فیصد کیسز میں سزائیں ہوئیں جبکہ 42 فیصد ملزمان بری ہو گئے۔

رپورٹ کے مطابق بیرون ملک مقیم پاکستانیوں کے لیے قائم خصوصی سیل کو مزید فعال بنانے اور کرپشن کی تحقیقات میں آرٹیفیشل انٹیلی جنس کے استعمال کی بھی منصوبہ بندی کی جا رہی ہے۔

تہران: اسرائیلی میڈیا نے دعویٰ کیا ہے کہ ایران کے دارالحکومت تہران میں ہونے والے ایک فضائی حملے میں ایرانی وزیرِ انٹیلیجنس اسماعیل خطیب کو نشانہ بنایا گیا ہے۔

اسرائیل کے ٹی وی چینل 12 کے مطابق اس حملے کے نتائج کا فی الحال جائزہ لیا جا رہا ہے اور یہ واضح نہیں ہو سکا کہ حملے میں کیا نقصان ہوا ہے یا ہدف کامیابی سے حاصل کیا گیا یا نہیں۔

دوسری جانب ایران کی جانب سے اس حوالے سے ابھی تک کوئی باضابطہ ردعمل سامنے نہیں آیا۔

یاد رہے کہ ایران اور اسرائیل کے درمیان جاری کشیدگی کے دوران دونوں ممالک ایک دوسرے پر حملوں کے دعوے کر رہے ہیں، جس سے خطے میں صورتحال مزید پیچیدہ ہوتی جا رہی ہے۔

افریقن فٹبال کنفیڈریشن نے (کاف) نے افریقا کپ آف نیشنز 2025 کے فائنل کے نتیجے کو متنازعہ حالات کے بعد تبدیل کردیا۔

تفصیلات کے مطابق افریقن فٹبال کنفیڈریشن نے مراکش کو افریقہ کپ آف نیشنز 2025 کا فاتح قرار دے دیا ہے۔

18 جنوری کو ہونے والے فائنل میں سینیگال نے مراکش کو 0-1 سے شکست دی تھی، تاہم میچ کے دوران ایک اہم موڑ اس وقت آیا جب آخری لمحات میں میزبان ٹیم کو پنالٹی دی گئی، جس پر سینیگالی کھلاڑیوں نے احتجاجاً کھیلنے سے انکار کر دیا۔

تقریباً 17 منٹ کے وقفے کے بعد کھیل دوبارہ شروع ہوا، مراکش کے براہم ڈیاز پنالٹی پر گول کرنے میں ناکام رہے جبکہ اضافی وقت میں پاپے گویئے نے گول کر کے سینیگال کو برتری دلائی۔

بعد ازاں مراکش فٹبال فیڈریشن کی اپیل پر کاف کی اپیل کمیٹی نے فیصلہ سناتے ہوئے سینیگال کو ضابطہ اخلاق کی خلاف ورزی کا مرتکب قرار دیا۔

اپیل بورڈ نے مراکش کی اپیل کو تسلیم کرتے ہوئے فیصلہ سنایا کہ ایونٹ قوانین کے آرٹیکل 84 کے مطابق فیلڈ چھوڑنا میچ فورفیٹ کرنے کے مترادف تھا۔

اعلامیے کے مطابق سینیگال نے کھیل چھوڑ کر قوانین کی خلاف ورزی کی جس کے نتیجے میں میچ 0-3 سے مراکش کے حق میں کردیا گیا۔

دوسری جانب سینیگال فٹبال فیڈریشن نے اس فیصلے کو غیر منصفانہ قرار دیتے ہوئے کورٹ آف آربیٹریشن فار اسپورٹ سے رجوع کرنے کا اعلان کیا ہے۔