ریاض: پیر کی علی الصبح ایرانی ڈرون حملے میں سعودی آرامکو کی راس تنورہ ریفائنری کو نشانہ بنایا گیا، جس کے نتیجے میں مقام پر معمولی آگ بھڑک اٹھی۔

ذرائع کے مطابق آگ پر بعد میں قابو پا لیا گیا اور اسے محدود نوعیت کا واقعہ قرار دیا گیا ہے۔ فوری طور پر کسی جانی نقصان کی اطلاع نہیں ملی۔

سعودی آرامکو کی راس تنورہ ریفائنری سعودی عرب کے مشرقی ساحل پر خلیج کے کنارے واقع ہے اور مملکت کے تیل کے بنیادی ڈھانچے میں اہم ریفائننگ مرکز سمجھی جاتی ہے۔

حکام کی جانب سے واقعے کی تحقیقات جاری ہیں جبکہ خطے میں سکیورٹی صورتحال پر کڑی نظر رکھی جا رہی ہے۔

لاہور:

لاہور کے علاقے رائیونڈ مانگا روڈ پر واقع ایک گھر میں آگ لگنے کے واقعے میں 12 سالہ بچہ جاں بحق جبکہ ایک بچہ زخمی ہوگیا۔

ریسکیو 1122 کے مطابق آگ لگنے کی اطلاع ملتے ہی امدادی ٹیمیں فوری طور پر جائے وقوعہ پر پہنچیں۔ حکام کا کہنا ہے کہ آگ گھر کے ایک کمرے میں لگی تھی۔ ریسکیو اہلکاروں کے پہنچنے تک آگ پر قابو پایا جا چکا تھا تاہم ایک بچہ موقع پر ہی دم توڑ چکا تھا۔

ریسکیو ذرائع کے مطابق جاں بحق ہونے والے بچے کی شناخت 12 سالہ شاہد ولد کرامت مسیح کے نام سے ہوئی۔ واقعے میں ایک اور بچہ زخمی ہوا جسے طبی امداد کے لیے جناح اسپتال منتقل کر دیا گیا۔

گجرانوالہ:

15 سالہ بچی سے زیادتی اور قتل کا ملزم پولیس مقابلے میں مارا گیا۔

پولیس ذرائع کے مطابق ملزم سلمان چیمہ روڈ کے محلہ کا رہائشی تھ، جس کی گرفتاری کے لیے چھاپا مارا گیا تو سامنے سے مزاحمت کی گئی، جس پر دوطرفہ فائرنگ کا تبادلہ ہوا اور ملزم اپنے ہی ساتھیوں کی گولیوں کا نشانہ بن گیا۔

ملزم نے تھانہ سول لائن کے علاقے میں 15 سالہ بچی کو زیادتی کے بعد قتل کیا تھا۔ ملزم کی لاش  کو شناخت کے بعد پوسٹ مارٹم کے لیے  ڈی ایچ کیو منتقل کر دیا گیا ہے ۔