Source link

پاکستانی میڈیا کی متنازع شخصیت ڈاکٹر عمر عادل نے اسٹیج ڈانس اور ماضی کی معروف اداکارہ نرگس کے حوالے سے ایک ایسا بیان دیا ہے جس نے سوشل میڈیا پر نئی بحث چھیڑ دی ہے۔

فلم اور موسیقی کے حوالے سے اپنی بے باک رائے کے لیے مشہور ڈاکٹر عمر عادل نے حالیہ گفتگو میں نرگس کے فن کے لیے غیر معمولی عقیدت کا اظہار کیا۔

نرگس ماضی میں فلم اور تھیٹر کی ایک بڑی اسٹار رہی ہیں، جو نہ صرف اپنی اداکاری بلکہ رقص کی مہارت کے باعث بھی پہچانی جاتی تھیں۔ وہ اپنے دور کی مہنگی ترین اداکاراؤں میں شمار ہوتی تھیں، تاہم بعد ازاں انہوں نے شوبز سے کنارہ کشی اختیار کرلی اور اب مذہبی تعلیمات کے مطابق زندگی گزار رہی ہیں۔

ڈاکٹر عمر عادل نے اپنے بیان میں کہا کہ اگر کسی کو نرگس کے رقص میں فحاشی نظر آتی ہے تو مسئلہ دیکھنے والوں کی نظر میں ہے۔

ان کے مطابق نرگس کی پرفارمنس میں خوبصورتی اور روحانیت کا عنصر موجود تھا، یہاں تک کہ وہ ان کے ڈانس کو دیکھ کر جذباتی ہوجاتے تھے اور آنکھوں میں آنسو آجاتے تھے۔

دوسری جانب سوشل میڈیا صارفین نے اس بیان پر مختلف ردعمل دیا ہے۔ کچھ افراد نے اسے غیر مناسب قرار دیا جبکہ بعض نے حیرت اور تنقید کا اظہار کیا۔ ایک صارف نے لکھا کہ ایسے خیالات رکھنے والوں کو مدد کی ضرورت ہے، جبکہ دیگر نے بھی سخت جملوں میں اپنی رائے پیش کی۔



Source link

سپر ہائی وے فقیرا گوٹھ میں کمسن بچے کے کھلے مین ہول میں گرنے کے واقعے کی سی سی ٹی وی فوٹیج سامنے آگئی۔

تفصیلات کے مطابق صنعتی ایریا تھانے کے علاقے سپر ہائی وے فقیرا گوٹھ میں 4 سالہ کمسن بچے کے کھلے مین ہول میں گر کر جاں بحق ہونے کے واقعے کی سی سی ٹی وی فوٹیج سامنے آگئی، 4 سالہ بچہ مین ہول میں کیسے گرا اور راہ گیروں نے کیسے بے حسی کا مظاہرہ کیا کیمرے نے عکس بندی کرلی۔

سی سی ٹی وی فوٹیج میں دیکھا جا سکتا ہے کہ 4 سالہ احسن گھر کی جانب جا رہا تھا، فوٹیج میں سڑک پر قطار میں چار مین ہولز کے ڈھکن کھلے ہوئے دیکھے جا سکتے ہیں۔ کمسن بچے نے ادھر ادھر دیکھتے ہوئے پہلا مین ہول کراس کیا، چاروں مین ہول کے اطراف بڑے پتھر رکھے ہوئے تھے۔

دوسرے مین ہول کے پاس پہنچتے ہی بچہ سیدھا کھلے مین ہول میں جا گرا، جس وقت بچہ گرا سڑک سے کئی لوگ گزر رہے تھے۔ فیملی کے ساتھ جاتا ایک موٹر سائیکل سوار گھوم کر واپس بھی آیا اور کھلے مین ہول میں کچھ سیکنڈ کے لیے دیکھتا بھی رہا لیکن موٹر سائیکل سوار نے کسی سے مدد لینے کی کوشش بھی نہیں کی، موٹر سائیکل سوار نے اترے بغیر اندر جھانکا اور واپس چلا گیا۔

واضح رہے کہ متوفی کمسن بچہ اتوار کی شام لاپتا ہوا تھا، متوفی کمسن بچے کے لواحقین نے اسے بہت تلاش کیا لیکن بچے کا کوئی سراغ نہیں ملا تھا اور پیر کو متوفی کمسن بچے کی لاش کھلے مین ہول سے مل گئی تھی۔

پولیس نے شبہ ظاہر کیا تھا کہ متوفی کمسن بچہ کھیلتے ہوئے کھلے مین ہول میں گر کر جاں بحق ہوا۔



Source link