وفاقی آئینی عدالت نے مقتولہ مسرت بی بی کی قبر کشائی کے خلاف دائر درخواست مسترد کرتے ہوئے ہائیکورٹ کا فیصلہ برقرار رکھا۔ عدالت نے مقتولہ کے شوہر محمد علی کی درخواست خارج کر دی۔

سماعت کے دوران شوہر کے وکیل نے مؤقف اختیار کیا کہ پاکستان ایک اسلامی معاشرہ ہے، اس لیے مقتولہ اہلیہ کی قبر کشائی کے حکم کو کالعدم قرار دیا جائے۔ اس پر عدالت میں ریمارکس دیتے ہوئے جسٹس حسن اظہر رضوی نے کہا کہ مقتولہ کی والدہ زبیدہ بی بی اپنی بیٹی کی قبر کشائی چاہتی ہیں کیونکہ انہیں شک ہے کہ ان کے داماد نے ان کی بیٹی کو قتل کیا ہے۔

جسٹس حسن اظہر رضوی نے سوال اٹھایا کہ کیا مقتولہ مسرت بی بی کو واقعی ہارٹ اٹیک ہوا تھا، جبکہ یہ بھی ریکارڈ پر ہے کہ بیٹی کی موت پر شوہر نے والدہ کو اطلاع تک نہیں دی۔ عدالت نے استفسار کیا کہ کیا شوہر میں اتنی انسانیت نہیں تھی کہ تدفین کے وقت والدہ کو مطلع کرتا۔

سماعت کے دوران عدالت نے یہ بھی پوچھا کہ کیا شوہر نے اس معاملے میں ضمانت حاصل کر رکھی ہے۔ وکیلِ صفائی نے مؤقف اپنایا کہ ان کے موکل کے خلاف کوئی ایف آئی آر درج نہیں ہے، جس پر جسٹس حسن اظہر رضوی نے ریمارکس دیے کہ آپ کے موکل نے ایف آئی آر درج ہی نہیں ہونے دی۔

درخواست کی سماعت جسٹس حسن اظہر رضوی کی سربراہی میں دو رکنی بینچ نے کی، جس کے بعد قبر کشائی کے خلاف درخواست مسترد کر دی گئی۔

سندھ ہائیکورٹ میں آئینی بینچ نے اساتذہ کے ٹائم اسکیل ختم کرنے اور اضافی مراعات واپس لینے کے خلاف درخواست پر سماعت کی۔

تفصیلات کے مطابق عدالت نے تنخواہ اور پنشن سے کٹوتی روکنے کا حکم صادر کردیا ہے۔ عدالت نے محکمہ خزانہ و دیگر کو مزید کارروائی سے بھی روک دیا۔

عدالت نے محکمہ تعلیم و دیگر فریقین کو نوٹس جاری کیا۔ عدالت نے درخواست کی سماعت تین ہفتوں کے لیے ملتوی کر دی۔

عدالت نے ریمارکس میں حکم صادر کرتے ہوئے کہا کہ آئندہ سماعت تک اساتذہ کی تنخواہ یا پنشن سے کسی قسم کی جبری وصولی نہ کی جائے۔

وکیل اسد اللہ بلو کا کہنا تھا کہ درخواست گزار محکمہ تعلیم میں ریٹائرڈ اور حاضر سروس اساتذہ ہیں، درخواست گزار ڈرائنگ ٹیچرز، فزیکل ٹریننگ انسٹرکٹرز اور ورکشاپ انسٹرکٹرز کے کیڈرز سے تعلق رکھتے ہیں۔

وکیل نے مزید کہا کہ متعلقہ اساتذہ کو سروس کے دوران قواعد و ضوابط کے تحت ترقی اور اپ گریڈیشن دی گئی۔ حکومتِ سندھ کی ٹائم اسکیل پالیسی کے مطابق گریڈ 15 سے 20 تک تنخواہیں ادا کی جاتی رہیں، محکمہ فنانس نے 21 جنوری کو خط لکھا تھا۔خط کے بعد محکمہ اسکول ایجوکیشن نے بھی عملدرآمد کا مراسلہ جاری کیا،

وکیل نے بتایا کہ درخواست گزار نے کہا کہ تنخواہوں میں کٹوتی اور دی گئی اضافی رقوم کی واپسی غیر قانونی ہے، کئی اساتذہ تو ریٹائرڈ بھی ہو چکے ہیں۔

وزیر داخلہ سندھ کی زیر صدارت سیکیورٹی تھریٹس سے متعلق سندھ اسمبلی میں اعلی سطحی ہنگامی اجلاس ہوا جس میں موجودہ حالات میں صوبے بھر میں سیکیورٹی تھریٹس کو زیر بحث لایا گیا۔

تفصیلات کے مطابق وزیر داخلہ سندھ ضیاءالحسن لنجار کا اجلاس میں کہنا تھا کہ ماضی کے واقعات اور حادثات کے پیش نظر ہمیں سخت فیصلے کرنے ہونگے۔ ائیرپورٹ پر زیادہ رش کیوجہ سے سیکیورٹی کو فول پروف بنانا ہوگا۔۔

انہوں نے کہا کہ ائیرپورٹ پک اینڈ ڈراپ پر ایک سے دو افراد کی اجازت ہوگی۔ کراچی پاکستان کا معاشی حب ہے۔ پولیس کو قانون نافذ کرنیوالے تمام اداروں سے روابط کو مضبوط بنانا ہوگا۔ جائے حادثہ پر کوئیک ریسپانس کے لیئے جامع ایس او پی بنائی جائے۔

انہوں نے کہا کہ حالات کے پیش نظر تمام صوبوں سے بہترین کوآرڈینیشن ہے۔ سندھ کی تمام جیلز میں تلاش ایپ ڈیوائس کی دستیابی یقینی بنائی جائے۔ اسنیپ چیکنگ،پکٹنگ کومبنگ آپریشن کے دوران تلاش ایپ ڈیوائس استعمال کی جائے جبکہ صوبائی سطح پر داخلی و خارجی پوائنٹس پر لیڈی سرچر کا ہونا لازمی ہے۔

انہوں نے کہا کہ اسلحہ کی نمائش کے خلاف بلاامتیاز کریک ڈاؤن کیا جائے۔ نیشنل ایکشن پلان کی تمام شقوں پر اسکی روح کے مطابق عمل درآمد کو یقینی بنایا جائے۔ کرایہ داری نامہ پر ایکٹ کے مطابق عمل درآمد کیا جائے۔

انہوں نے مزید کہا کہ ریلوے اسٹیشن،بس ٹرمینلز،ٹرک اڈوں اور دیگر مال برداری کے مقامات پر کڑی نگرانی رکھی جائے۔