عازمین حج کے لیے خوشخبری ہے کہ رواں سال حج پروازوں کا باقاعدہ شیڈول جاری کر دیا گیا ہے اور پاکستان سے پہلی حج پرواز 18 اپریل کو روانہ ہوگی۔

سرکاری حج اسکیم کے تحت مجموعی طور پر 468 پروازوں کے ذریعے ایک لاکھ 19 ہزار عازمین کو حجازِ مقدس پہنچایا جائے گا۔

ذرائع کے مطابق 18 اپریل کو کراچی، لاہور، سیالکوٹ اور ملتان سے پہلی پروازیں روانہ ہوں گی۔ حج آپریشن کے پہلے روز چار پروازوں کے ذریعے عازمین کو مدینہ منورہ پہنچایا جائے گا۔

ابتدائی 15 روز تک عازمین کو مدینہ منورہ منتقل کیا جائے گا، جبکہ جدہ کے لیے حج پروازوں کا آغاز 4 مئی سے ہوگا۔

مدینہ منورہ کے لیے پہلی طویل دورانیے کی پرواز 7 مئی کو روانہ کی جائے گی، جبکہ پاکستان سے آخری حج پرواز 21 مئی کو اڑان بھرے گی۔ مجموعی طور پر حج آپریشن 34 روز جاری رہے گا۔

سرکاری اسکیم کے تحت 67 ہزار 230 مرد اور 51 ہزار 846 خواتین عازمین کو سعودی عرب لے جایا جائے گا۔ مدینہ منورہ کے لیے 186 جبکہ جدہ کے لیے 282 پروازیں آپریٹ کی جائیں گی۔

حج آپریشن میں قومی و نجی ایئر لائنز حصہ لیں گی جن میں پاکستان انٹرنیشنل ایئرلائن، ایئر بلیو، ایئر سیال اور سعودی ایئر لائن شامل ہیں۔

کراچی سمیت ملک کے آٹھ شہروں سے حج پروازیں چلائی جائیں گی۔ اسلام آباد سے 129، کراچی سے 124 اور لاہور سے 104 پروازیں روانہ ہوں گی۔

کوئٹہ سے 18، ملتان سے 34 اور سیالکوٹ سے 26 حج پروازیں آپریٹ کی جائیں گی، جبکہ فیصل آباد سے 23 اور سکھر سے 5 پروازیں عازمین کو سعودی عرب پہنچائیں گی۔

حکام کے مطابق تمام انتظامات مکمل کر لیے گئے ہیں اور عازمین کو بروقت اور سہولت کے ساتھ حجازِ مقدس پہنچانے کے لیے خصوصی اقدامات کیے جا رہے ہیں۔

اسلام آباد:

آئی ایم ایف نے سیکیورٹی خدشات کے پیش نظر پاکستان کا دورہ قبل ازوقت ختم کرنے کا فیصلہ کرلیاہے، اور اب 1.2 ارب ڈالرزکی اگلی قرض قسط کیلیے مذاکرات ترکیہ سے آن لائن جاری رکھے جائیں گے۔ 

آئی ایم ایف مشن نے کل صبح وزیر خزانہ محمد اورنگزیب سے پہلی ملاقات کی، جس کے فوراً بعد مشن نے پاکستان چھوڑدیا۔

اس پیش رفت سے ایک روزقبل امریکا نے پاکستان کیلیے لیول تھری سیکیورٹی الرٹ جاری کرتے ہوئے اپنے شہریوں کوسفر پر نظرثانی اور بڑے اجتماعات سے گریزکی ہدایت کی تھی، جبکہ بعض علاقوں کو لیول فورقرار دیکر سفرکیلیے ممنوع قراردیاگیا۔

آئی ایم ایف کے پاکستان میں نمائندہ  کی جانب سے جاری بیان کے مطابق مشن  توسیعی فنڈ سہولت کے تیسرے جائزے اور ریزیلینس اینڈسسٹین ایبلٹی فیسلٹی  کے دوسرے جائزے پر حکام سے بات چیت کر رہا ہے، مذاکرات اب ورچوئل طریقے سے جاری رہیں گے۔

ذرائع کے مطابق مشن 11مارچ تک پاکستان میں قیام پذیر تھا، تاہم خطے میں کشیدگی اور امریکی سفارتی تنصیبات کے باہرمظاہروں کے باعث سیکیورٹی صورتحال پیچیدہ ہوگئی۔

امریکی سفارت خانے نے لاہور اورکراچی میں قونصل خانوں کے باہر مظاہروں اور اسلام آبادو پشاورمیں مزید احتجاج کی کالز کا ذکر کرتے ہوئے عملے کی نقل و حرکت محدود کر دی ہے۔

افتتاحی اجلاس میں آئیوا پیٹرووا نے معاشی استحکام کیلیے پائیدار اصلاحات اور محصولات میں اضافے کی ضرورت پر زوردیا۔

ان کا کہنا تھا کہ معاشی نمو میں حالیہ بہتری خوش آئند ہے، تاہم اسے برقرار رکھنے کیلیے اصلاحات ناگزیر ہیں۔

انہوں نے صحت اور تعلیم کے شعبوں میں سماجی اخراجات بڑھانے کی اہمیت بھی اجاگر کی، مشن کی اچانک روانگی کے باعث خودمختار ویلتھ فنڈ میں ترامیم، ای پروکیورمنٹ کے نظام، احتسابی اداروں سے معلومات کے تبادلے اور سرکاری و عسکری ملکیتی کمپنیوں کودی جانیوالی مراعات کے خاتمے سے متعلق اجلاس منسوخ ہوگئے۔

فیڈرل بورڈآف ریونیوکی کارکردگی پر بھی اجلاس ملتوی کر دیا گیا۔ ادھرگلوبل تھنک ٹینک نیٹ ورک نے بیوروکریٹس کے غیر اعلانیہ اثاثوں کے معاملے پرآئی ایم ایف کے طریقہ کار میں خامیوں کی نشاندہی کی ہے۔

کراچی:

شہر قائد کے مختلف علاقوں میں پولیس اور مبینہ ڈاکوؤں کے درمیان مقابلوں کے دوران 6 زخمیوں سمیت مجموعی طور پر 11 ملزمان کو گرفتار کر لیا گیا۔

پولیس حکام کے مطابق تمام کارروائیاں مختلف تھانوں کی حدود میں کی گئیں اور گرفتار ملزمان سے اسلحہ، موبائل فونز، نقد رقم اور موٹرسائیکلیں برآمد کی گئی ہیں۔

تفصیلات کے مطابق کراچی پولیس کے تھانہ سکھن کی حدود بھینس کالونی فاطمہ سوسائٹی کے قریب مبینہ مقابلے میں ایک ملزم زخمی حالت میں گرفتار کیا گیا۔

زخمی ملزم کی شناخت وسیم کے نام سے ہوئی جسے طبی امداد کے لیے جناح اسپتال منتقل کر دیا گیا، جبکہ اس کے قبضے سے اسلحہ بھی برآمد ہوا۔

زمان ٹاؤن پولیس نے کورنگی کریک روڈ پر مبینہ مقابلے کے بعد دو ملزمان کو گرفتار کیا، جن میں ایک زخمی محمد اقبال کو جناح اسپتال منتقل کیا گیا جبکہ دوسرا ملزم معین کو تھانے لے جایا گیا۔

پولیس کے مطابق گرفتار افراد سے اسلحہ، موبائل فون، نقدی اور موٹرسائیکل برآمد ہوئی۔

شارع نور جہاں پولیس نے نارتھ ناظم آباد عبداللہ کالج کے قریب کارروائی کرتے ہوئے دو زخمیوں سمیت تین ملزمان کو گرفتار کیا۔

زخمی ملزمان عرفان علی اور ندیم احمد کو عباسی شہید اسپتال منتقل کیا گیا جبکہ تیسرے ملزم امجد علی کو تھانے منتقل کر دیا گیا۔

پولیس ترجمان کے مطابق ملزمان کے قبضے سے دو پستولیں، موبائل فون، نقد رقم اور موٹرسائیکل برآمد کی گئی۔

سرجانی ٹاؤن پولیس نے بروہی گوٹھ میں مبینہ مقابلے کے بعد دو ملزمان کو گرفتار کیا، جن میں زخمی عبداللہ شاہ کو اسپتال منتقل کیا گیا جبکہ دوسرا ملزم عمیر پولیس کی تحویل میں ہے۔

اس کارروائی میں بھی اسلحہ اور موٹرسائیکل برآمد کی گئی۔

گلبرگ پولیس نے فیڈرل بی ایریا بلاک 11 میں کارروائی کرتے ہوئے تین ملزمان کو گرفتار کیا، جن میں زخمی اویس کو اسپتال منتقل کیا گیا جبکہ دیگر دو ملزمان محمد آصف اور ارشد کو تھانے منتقل کر دیا گیا۔

پولیس حکام کا کہنا ہے کہ تمام گرفتار ملزمان کے خلاف مقدمات درج کر کے مزید تفتیش شروع کر دی گئی ہے۔