پشاور:

پاکستان رائٹس موومنٹ کے سربراہ سابق سینیٹر مشتاق احمد خان نے خیبر سے کراچی تک غزہ مارچ کا اعلان کردیا۔ 

پشاور میں پریس کانفرنس کرتے ہوئے مشتاق احمد خان نے کہا کہ 29 مارچ سے مارچ کا آغاز ہوگا، ہم امریکہ کے خلاف مجتبیٰ خامنہ ای کیساتھ ہیں۔ امریکہ و اسرائیل ایران کی جنگ ہار چکے ہیں۔

مشتاق احمد خان نے کہا کہ رمضان کے مقدس مہینے میں قبلہ اول کو تالے لگے ہیں، مسجد اقصیٰ 69 سالوں میں پہلی بار رمضان میں بند ہے، نیتن یاہو نے کہا ہے دجال آنے والا ہے، مسجد اقصیٰ کو گرا دیا گیا تو آنسو بہانے سے کچھ نہیں ہوگا۔

انہوں نے کہا کہ غزہ پیس بورڈ فراڈ ہے جس سے انڈونیشیا نکل گیا، پاکستان کو بھی چاہئے کہ وہ فوری پس بورڈ سے نکل آئے، غزہ پیس بورڈ کے پہلے اجلاس کے بعد ایران اور لبنان پر حملہ ہوگیا، پاکستان ایران کیساتھ کھڑا ہو جائے جبکہ افغانستان کیساتھ معاملات کو نارمل کیا جائے۔

مشتاق احمد خان نے کہا کہ غزہ میں تین لاکھ  کے قریب بچے شہید ہوچکے ہیں، اسرائیل بھوک کو جنگی ہتھیار کے طور پر استعمال کررہا ہے، 72 ہزار ٹرک غزہ میں جانے چاہئے تھے صرف 30 ہزار ہی جاسکے ہیں۔

لاہور:

سندر میں ایک شوہر نے بیوی کے مبینہ تشدد پر سیف سٹی پبلک سیفٹی ایپ کے ذریعے شکایت درج کرادی۔

ترجمان کے مطابق تھانہ سندر کی حدود میں رہنے والے ایک شہری نے سیف سٹی پبلک سیفٹی ایپ کے ویڈیو کال فیچر کے ذریعے مدد طلب کی اور بتایا کہ اس کی بیوی کی جانب سے اس پر مبینہ تشدد کیا جا رہا ہے۔ 

شہری نے ویڈیو کال کے دوران مبینہ تشدد کے شواہد بھی ریکارڈ کروائے اور جان سے مارنے کی دھمکی کے بارے میں آگاہ کیا۔

سیف سٹی آفیسر نے شکایت موصول ہوتے ہی فوری طور پر تھانہ سندر پولیس کو اطلاع دی، جس پر پولیس ٹیم فوری طور پر موقع پر پہنچ گئی۔ پولیس نے دونوں فریقین سے تفصیلی معلومات حاصل کر کے معاملے کی جانچ پڑتال کی۔

ترجمان کے مطابق سیف سٹی آفیسر اور پولیس کی بروقت کارروائی کے باعث گھریلو تنازعہ خوش اسلوبی سے حل کر لیا گیا۔

سیف سٹی ترجمان کا کہنا ہے کہ سیف سٹی پبلک سیفٹی ایپ شہریوں کو ہنگامی حالات میں فوری معاونت فراہم کرنے میں مؤثر کردار ادا کر رہی ہے۔ شہری اس ایپ کے ذریعے ویڈیو کال کر کے اپنی شکایت درج کروا سکتے ہیں اور کسی بھی ہنگامی صورتحال میں ویڈیو شواہد براہ راست سیف سٹی کے ساتھ شیئر کر سکتے ہیں۔

قومی کرکٹ ٹیم کی سلیکشن کمیٹی کے رکن عاقب جاوید کا کہنا ہے کہ ٹیم کا انتخاب کوئی ایک شخص اکیلے نہیں کرتا۔

قذافی اسٹیڈیم لاہور میں سلیکشن کمیٹی کے ممبران عاقب جاوید، مصباح الحق، سرفراز احمد اور اسد شفیق نے مشترکہ پریس کانفرنس کی۔

عاقب جاوید کا کہنا تھا کہ ٹیم کا انتخاب سلیکشن کمیٹی، کوچ اور کپتان کی مشاورت سے ہوتا ہے۔

انہوں نے کہا کہ بدقسمتی سے ٹی ٹوئنٹی ورلڈکپ میں ٹیم توقعات پر پورا نہیں اترسکی لیکن کارکردگی بہتر رہی۔

عاقب جاوید کا کہنا تھا کہ بھارت سے ہارنے کا دکھ بہت ہوتا ہے، لیکن ہم ان سے آج تک نہیں جیت سکے ہیں۔ سپر ایٹ میں صرف ایک میچ ہارے، ایک بارش کی نظر ہوگیا جس کے بعد رن ریٹ پر باہر ہوگئے۔

انہوں نے مزید کہا کہ سری لنکا کے خلاف میچ میں جیسی پچ تھی اس پر کسی ٹیم کو کم اسکور پر آؤٹ ہونا ناممکن تھا۔

عاقب جاوید کا کہنا تھا کہ پاکستان ٹیم کی کارکردگی میری نظر میں بہتر ہوئی ہے، ہم نے جنوبی افریقا کو جنوبی افریقا میں، آسٹریلیا کو آسٹریلیا میں ہرایا۔

انہوں نے کہا کہ بنگلادیش کے خلاف سیریز میں کسی کو ڈراپ نہیں کیا گیا، آرام دے کر نئے کھلاڑیوں کو موقع دیا گیا ہے۔ بابر اعظم، فخر زمان اور سلمان مرزا ابھی کھیلنے کے لیے فٹ نہیں ہیں۔

ایک سوال کے جواب میں عاقب جاوید کا کہنا تھا کہ اب دوبارہ وسیم اور وقار جیسے بولرز نہیں آسکتے، اس دور میں صرف بمراہ کے علاوہ کوئی ایسا بولر نہیں ہے جسے کھیلنا مشکل ہو۔

سرفراز احمد کا کہنا تھا ہمارے پاس دو تین وکٹ کیپرز آپشن کے طور پر موجود ہیں، نئے کھلاڑیوں کو اگلے سیزن میں موقع دیں گے۔