لاہور پولیس نے رواں ماہ کے دوران اب تک قتل، ڈکیتی سمیت دیگر سنگین جرائم میں ملوث 119 گینگز کو گرفتار کرلیا۔

ایکسپریس نیوز کے مطابق لاہور پولیس نے رواں ماہ کے دوران119خطرناک گینگز کے 269 افراد کو گرفتار کیا جن سے لاکھوں روپے برآمد ہوئے ہیں۔

پولیس کے مطابق گرفتار ملزمان کے قبضے سے 75 لاکھ 83 ہزار روپے مالیت کی اشیا برآمد ہوئیں، جبکہ 25 چھینی اور چوری کی گئیں موٹرسائیکلیں، 2 رکشے اور 64 موبائل فونز بھی برآمد ہوئے ہیں۔

اس کے علاوہ 13لاکھ 73 ہزار سے زائد نقدی بھی قبضہ میں لی گئی۔

ڈی آئی جی آپریشنز فیصل کامران نے بتایا کہ ماہِ صیام کے دوران بھی جرائم پیشہ عناصر کے خلاف بھرپورکارروائیاں کی گئیں، موثر حکمت عملی کی بدولت عید الفطر کو پُر امن بنایا۔

انہوں نے بتایا کہ عید کے ایام میں بھی نقص امن کا سبب بننے والوں کو گرفت میں لیا گیا، چوری وڈکیتی کی وارداتوں کے تدارک کیلئے کارروائیاں جاری ہیں۔

اُن کے مطابق لاہور پولیس قیام امن کیلئے تمام تر دستیاب وسائل بروئے کار لارہی ہے۔
 



Source link

نائب وزیراعظم اور وزیرخارجہ اسحاق ڈار سے چین کے سفیر جیانگ زیڈونگ اور برطانوی ہائی کمشنر جین میریٹ نے الگ،الگ ملاقات کی جہاں خطے میں پیدا ہونے والی صورت حال پر تبادلہ خیال کیا گیا اور تنازعات کے حل کے لیے مذاکرات پر زور دیا گیا۔

ترجمان دفترخارجہ کی جانب سے جاری بیان میں کہا گیا کہ چین کے سفیر جیانگ زیڈونگ نے نائب وزیراعظم اور وزیر خارجہ اسحاق ڈار سے ملاقات کی اور اس موقع پر گفتگو میں علاقائی اور عالمی پیش رفت پر توجہ مرکوز کی گئی۔

انہوں نے بتایا کہ اسحاق ڈار نے مشرق وسطیٰ اور وسیع تر خطے میں مذاکرات اور سفارت کاری کے ذریعے تناؤ میں کمی پر زور دیا۔

اسحاق ڈار اور چینی سفیر نے تمام موسمی تزویراتی تعاون و شراکت داری جاری رکھنے کا اعادہ کیا اور دونوں نے باہمی دلچسپی کے امور پر قریبی تعاون برقرار رکھنے پر بھی اتفاق کیا۔

ترجمان دفتر خارجہ کے مطابق نائب وزیراعظم سے پاکستان میں برطانوی ہائی کمشنر جین میریٹ نے بھی ملاقات کی، جس میں علاقائی صورت حال پر تبادلہ خیال کیا گیا۔

اعلامیے میں کہا گیا کہ نائب وزیراعظم اور وزیرخارجہ اسحاق ڈار نے تنازع کے فوری حل کی ضرورت کو نمایاں کرتے ہوئے زور دیا کہ سفارت کاری اور مذاکرات آگے بڑھنے کا واحد راستہ ہے۔



Source link

شہر قائد کے مختلف علاقوں میں ہیوی ٹریفک سے حادثات کے دوران 3 افراد جاں بحق اور ایک شخص زخمی ہوگیا۔

تفصیلات کے مطابق منگھوپیر ناردرن بائی پاس کے قریب ٹرک کی رکشے کو ٹکر کے نتیجے میں 2 افراد جاں بحق ہوئے جن کی لاشوں کو عباسی شہید اسپتال منتقل کیا گیا جہاں انکی شناخت 25 سالہ عمران اور 26 سالہ  سعد کے ناموں سے کی گئی۔

ایس ایچ او تھانہ منگھوپیر انیس احمد کے مطابق حادثہ لوڈر ٹرک کی رکشہ کو ٹکر کے نتیجے میں پیش آیا۔ حادثے میں جاں بحق ہونے والوں میں رکشہ سوار اور ڈرائیور شامل ہیں۔۔تاہم حادثے کے بعد ٹرک ڈرائیور فرار ہوگا جبکہ ٹرک کو تحویل میں لے لیا گیا ہے۔

انہوں نے بتایا کہ حادثے کے وقت ٹرک پر کسی قسم کا لوڈ موجود نہیں تھا۔ واقعے کی اطلاع ملتے ہی جاں بحق افراد کے اہل خانہ بھی عباسی شہید اسپتال پہنچ گئے۔

عمران کے ماموں کے مطابق حادثے کے بعد دونوں افراد آدھے گھنٹے تک سڑک پر لاوارث پڑے رہے، دونوں نوجوان منگھوپیر سے اورنگی ٹاؤن کی جانب آرہے تھے اس ہی دوران تیز رفتاری سے آنے والا ٹرک رکشے میں جاگھسا۔

انہوں نے مزید بتایا کہ رکشے میں جاں بحق افراد کے ساتھ مزید 3 بچے بھی موجود تھے جو حادثے کے نتیجے میں زخمی ہوئے۔ عمران کے ماموں کے مطابق عمران گھر کا بڑا بیٹا تھا اسکے 4 چھوٹے بہن بھائی ہیں جبکہ والد کی وفات کے بعد سعد بھی گھر کا  واحد کفیل تھا۔

لواحقین نے مطالبہ کیا کہ سڑک پر بے لگام دوڑتی ہیوی ٹریفک کو لگام ڈال کو شہریوں کی جان کو محفوظ کیا جائے۔

دوسری جانب کورنگی چمڑا چورنگی کے قریب ٹریفک حادثے کے دوران ایک شخص جاں بحق دوسرا زخمی ہوگیا۔۔ریسکیو حکام کے مطابق حادثہ واٹر ٹینکر کی موٹر سائیکل کو ٹکر کے نتیجے میں پیش آیا۔

جاں بحق اور زخمی کو جناح اسپتال منتقل کیا گیا جہاں جاں بحق کی شناخت بلال زخمی کی اور 15 سالہ ساجد ولد عابد کے ناموں سے کرلی گئی ہے۔

ایس ایچ او تھانہ کورنگی صنعتی ایریا ناصر محمود کے مطابق حادثہ چمڑا چورنگی سے گودام چورنگی جاتے ہوئے واٹر ٹینکر کی موٹر سائیکل کو ٹکر کے نتیجے میں پیش آیا۔

حادثے کے بعد فوری کارروائی کرتے ہوئے ٹینکر کو تحویل میں لے لیا گیا ہے جبکہ موقع سے  ایک شخص کو حراست میں لیا گیا جسکے حوالے سے بتایا گیا کہ وہ ٹینکر ڈرائیور ہے تاہم تفتیش میں معلوم ہوا کہ وہ راہ گیر ہے اور حادثے کے بعد وہاں پہنچا تھا جسکے بعد پولیس نے حراست میں لئے گئے شخص کو رہا کردیا۔

 زخمی نوجوان ساجد کے مطابق کورنگی شریف آباد سے قیوم آباد جاتے ہوئے ٹینکر ڈرائیور نے سائڈ سے موٹر سائیکل کو ٹکر ماری جسکے نتیجے میں موٹر سائیکل پر پیچھے بیٹھا بلال نیچے گرا اور ٹینکر کے پچھلے ٹائروں کے نیچے آگیا اور موقع پر ہی جاں بحق ہوگیا۔



Source link