عینی شاہدین اور مقامی ذرائع کے مطابق رات گئے کوئٹہ کراچی قومی شاہراہ کے خضدار اور سوراب کے درمیان حصے پر نامعلوم مسلح افراد نے متعدد مسافر کوچز کو روک کر لوٹ لیا۔

واقعے میں سوار درجنوں مسافروں کو نقدی، موبائل فونز، زیورات اور دیگر قیمتی اشیاء سے محروم کر دیا گیا۔

ذرائع کا کہنا ہے کہ مسلح افراد نے رات کے اوقات میں سڑک پر رکاوٹ کھڑی کر کے کوچز کو روکا اور مسافروں کی تلاشی لے کر ان کا قیمتی سامان چھین لیا۔

ایک مسافر نے بتایا کہ ڈاکو منظم تھے اور جدید ہتھیاروں سے لیس تھے۔ خواتین اور بچوں سمیت کسی کو بھی نہیں بخشا گیا۔

یہ واقعہ اسی شاہراہ کے اس حصے پر پیش آیا جہاں گزشتہ چند ماہ کے دوران لوٹ مار کی متعدد شکایات سامنے آ چکی ہیں مقامی لوگوں کا کہنا ہے کہ سوراب تا خضدار سیکشن رات کے اوقات میں شدید غیر محفوظ ہو چکا ہے اور مسافر ٹرانسپورٹ کے ڈرائیورز بھی اس روٹ پر رات کے سفر سے گریز کر رہے ہیں۔

بلوچستان پولیس کے ترجمان سے رابطہ کرنے کی کوشش کی گئی،تاہم اب تک کوئی آفیشل بیان یا تصدیق حاصل نہیں ہو سکی۔

تاہم متاثرہ مسافروں نے پولیس میں شکایات درج کرانے کا ذکر کیا ہےمسافر ٹرانسپورٹ ایسوسی ایشن کے نمائندوں نے شدید تشویش کا اظہار کرتے ہوئے کہا کہ قومی شاہراہ پر سیکورٹی کے فقدان کی وجہ سے مسافروں کی جان و مال کو شدید خطرہ لاحق ہے۔

حکومت کو فوری طور پر اضافی فورسز تعینات کرنی چاہییں اور باقاعدہ گشت یقینی بنانا چاہیےبلوچستان میں قومی شاہراہوں پر لوٹ مار کے واقعات میں اضافے نے عوام میں شدید تشویش پیدا کر دی ہے۔

متاثرین نے حکومت سے مطالبہ کیا ہے کہ ملزمان کو جلد گرفتار کیا جائے اور لوٹا گیا سامان واپس دلایا جائے

کراچی:

کراچی کے علاقے نیو کراچی انڈسٹریل ایریا میں پولیس نے کارروائی کرتے ہوئے مبینہ مقابلے کے دوران ایک ملزم کو زخمی حالت میں گرفتار کر لیا۔

پولیس کے مطابق مقابلہ سیکٹر 6 بی صبا سنیما کے قریب پیش آیا جہاں ملزم کو زخمی حالت میں حراست میں لیا گیا۔

گرفتار ملزم کو فوری طور پر عباسی شہید اسپتال منتقل کیا گیا جہاں اس کی شناخت محمد ابراہیم کے نام سے کی گئی ہے۔

پولیس حکام کا کہنا ہے کہ ملزم کے قبضے سے اسلحہ بھی برآمد ہوا ہے جبکہ واقعے کی مزید تحقیقات جاری ہیں۔

کراچی:

شہر قائد کے مختلف علاقوں میں پولیس نے کارروائیاں کرتے ہوئے مبینہ مقابلوں کے دوران دو ملزمان کو زخمی حالت میں گرفتار کر لیا جبکہ ایک ملزم فرار ہونے میں کامیاب ہوگیا۔

پولیس کے مطابق نیو کراچی سیکٹر ایل 11 میں نیو کراچی پولیس نے مبینہ مقابلے کے دوران ایک ملزم کو زخمی حالت میں گرفتار کیا۔

گرفتار ملزم کی شناخت عیسیٰ خان کے نام سے ہوئی ہے جسے فوری طور پر اسپتال منتقل کر دیا گیا۔ پولیس کا کہنا ہے کہ ملزم کے قبضے سے اسلحہ اور دیگر سامان بھی برآمد ہوا ہے۔

دوسری کارروائی حسن کالونی میں گلبرگ پولیس نے کی، جہاں مبینہ مقابلے کے دوران ایک ملزم زخمی حالت میں گرفتار کر لیا گیا جبکہ اس کا ساتھی فرار ہوگیا۔

گرفتار ملزم کی شناخت کاشف عرف کاشی کے نام سے ہوئی ہے جسے طبی امداد کے لیے اسپتال منتقل کیا گیا۔

پولیس حکام کے مطابق دونوں واقعات کی مزید تحقیقات جاری ہیں اور فرار ملزم کی تلاش کے لیے مختلف مقامات پر چھاپے مارے جا رہے ہیں۔