کراچی:

کراچی کے علاقے نیو کراچی انڈسٹریل ایریا میں پولیس نے کارروائی کرتے ہوئے مبینہ مقابلے کے دوران ایک ملزم کو زخمی حالت میں گرفتار کر لیا۔

پولیس کے مطابق مقابلہ سیکٹر 6 بی صبا سنیما کے قریب پیش آیا جہاں ملزم کو زخمی حالت میں حراست میں لیا گیا۔

گرفتار ملزم کو فوری طور پر عباسی شہید اسپتال منتقل کیا گیا جہاں اس کی شناخت محمد ابراہیم کے نام سے کی گئی ہے۔

پولیس حکام کا کہنا ہے کہ ملزم کے قبضے سے اسلحہ بھی برآمد ہوا ہے جبکہ واقعے کی مزید تحقیقات جاری ہیں۔

کراچی:

شہر قائد کے مختلف علاقوں میں پولیس نے کارروائیاں کرتے ہوئے مبینہ مقابلوں کے دوران دو ملزمان کو زخمی حالت میں گرفتار کر لیا جبکہ ایک ملزم فرار ہونے میں کامیاب ہوگیا۔

پولیس کے مطابق نیو کراچی سیکٹر ایل 11 میں نیو کراچی پولیس نے مبینہ مقابلے کے دوران ایک ملزم کو زخمی حالت میں گرفتار کیا۔

گرفتار ملزم کی شناخت عیسیٰ خان کے نام سے ہوئی ہے جسے فوری طور پر اسپتال منتقل کر دیا گیا۔ پولیس کا کہنا ہے کہ ملزم کے قبضے سے اسلحہ اور دیگر سامان بھی برآمد ہوا ہے۔

دوسری کارروائی حسن کالونی میں گلبرگ پولیس نے کی، جہاں مبینہ مقابلے کے دوران ایک ملزم زخمی حالت میں گرفتار کر لیا گیا جبکہ اس کا ساتھی فرار ہوگیا۔

گرفتار ملزم کی شناخت کاشف عرف کاشی کے نام سے ہوئی ہے جسے طبی امداد کے لیے اسپتال منتقل کیا گیا۔

پولیس حکام کے مطابق دونوں واقعات کی مزید تحقیقات جاری ہیں اور فرار ملزم کی تلاش کے لیے مختلف مقامات پر چھاپے مارے جا رہے ہیں۔

راولپنڈی:

تھانہ مورگاہ کے علاقے راہ امن میں ڈکیتی کی واردات کے دوران مزاحمت پر مسلح موٹر سائیکل سوار ملزمان کی فائرنگ سے خاتون سمیت تین افراد شدید زخمی ہوگئے۔

پولیس کے مطابق زخمیوں میں 55 سالہ مشتاق، ان کی اہلیہ صغریٰ اور پڑوسی مہتاب عمر شامل ہیں، جنہیں فوری طور پر اسپتال منتقل کر دیا گیا جہاں ان کی حالت تشویشناک بتائی جا رہی ہے۔

ابتدائی اطلاعات کے مطابق متاثرہ افراد ایک عزیز کی تیمارداری کے بعد گھر واپس جا رہے تھے کہ راستے میں موٹر سائیکل سوار ڈاکوؤں نے انہیں روک کر زیورات اور پرس چھیننے کی کوشش کی۔ مزاحمت کرنے پر ملزمان نے اندھا دھند فائرنگ کر دی۔

پولیس کا کہنا ہے کہ ملزمان خاتون سے سونے کا کڑا چھین کر فائرنگ کرتے ہوئے موقع سے فرار ہوگئے۔

واقعے کی اطلاع ملتے ہی پولیس موقع پر پہنچ گئی اور علاقے کو گھیرے میں لے کر ملزمان کی تلاش شروع کر دی گئی ہے۔