گجرات کے تھانہ کڑیانوالہ کی چوکی جلالپور صوبتیاں میں تعینات پنجاب پولیس کے کانسٹیبل عمر آفتاب ڈاکوؤں سے مقابلے کے دوران شہید ہوگئے۔

ترجمان پنجاب پولیس کے مطابق دو نامعلوم موٹرسائیکل سوار ڈاکو ایک فیملی سے زیورات اور نقدی چھین کر فرار ہو رہے تھے کہ پولیس نے ان کا تعاقب کیا۔

اس دوران ملزمان نے اندھا دھند فائرنگ شروع کر دی جس کے نتیجے میں کانسٹیبل عمر آفتاب سر پر گولی لگنے سے موقع پر شہید ہوگئے۔

فائرنگ کے تبادلے میں ایک ڈاکو اپنے ہی ساتھی کی گولی سے ہلاک ہوگیا جبکہ دوسرا فرار ہونے میں کامیاب ہو گیا، جس کی گرفتاری کے لیے کارروائیاں جاری ہیں۔

آئی جی پنجاب عبدالکریم نے شہید کانسٹیبل کی قربانی کو خراج عقیدت پیش کرتے ہوئے کہا ہے کہ اہل خانہ کی مکمل دیکھ بھال کو یقینی بنایا جائے گا۔

امریکی صدر ڈونلڈ ٹرمپ کی جانب سے ایران کے خلاف جنگ جاری رکھنے کے اعلان کے بعد ایشیا کی اسٹاک مارکیٹس میں نمایاں مندی دیکھی گئی ہے جہاں سرمایہ کاروں نے حالیہ عالمی حالات اور ٹرمپ کے خطاب کے بعد محتاط رویہ اختیار کر لیا۔

جاپان کی نکی 225 میں 1.5 فیصد کمی ریکارڈ کی گئی، جبکہ جنوبی کوریا کی اسٹاک مارکیٹ کوسپی 2.6 فیصد نیچے آ گئی۔ اسی طرح ہانک کانگ کی ہینگ سینگ انڈیکس میں بھی تقریباً 1 فیصد کمی دیکھی گئی۔

مارکیٹ ماہرین کے مطابق خطے کی اسٹاک مارکیٹس میں اتار چڑھاؤ اس وقت سے جاری ہے جب فروری کے آخر میں ایران سے متعلق کشیدگی میں اضافہ ہوا۔

ایشیا کی معیشتیں توانائی کے لیے مشرق وسطیٰ پر انحصار کرتی ہیں، اسی لیے کسی بھی تنازع کے اثرات فوری طور پر مالیاتی منڈیوں پر ظاہر ہوتے ہیں۔

صدر ڈونلڈ ٹرمپ کے امریکی عوام سے خطاب میں ایران کے خلاف جنگ جاری رکھنے کے اعلان کے بعد عالمی منڈی میں خام تیل کی قیمتوں میں بھی نمایاں اضافہ ہو گیا ہے۔

عالمی سطح پر برطانوی معیار کا خام تیل برینٹ تقریباً 4 فیصد اضافے کے بعد 105.55 ڈالر فی بیرل تک جا پہنچا، جبکہ امریکی خام تیل ویسٹ ٹیکساس انٹرمیڈیٹ بھی 3 فیصد اضافے کے ساتھ 103 ڈالر فی بیرل کی سطح پر ٹریڈ کر رہا ہے۔

ماہرین کے مطابق خطے میں ممکنہ عسکری کارروائیوں اور سپلائی متاثر ہونے کے خدشات کے باعث سرمایہ کاروں نے محتاط رویہ اختیار کیا ہے جس کا براہِ راست اثر عالمی توانائی مارکیٹ پر پڑ رہا ہے۔

صدر ڈونلڈ ٹرمپ نے اپنے خطاب میں ایران کے خلاف کارروائی جاری رکھنے اور آئندہ چند ہفتوں میں مزید سخت اقدامات کا عندیہ دیا تھا جس کے بعد مارکیٹ میں غیر یقینی صورتحال مزید بڑھ گئی ہے۔