امیر جماعت اسلامی حافظ نعیم الرحمن نے پیٹرولیم مصنوعات کی قیمتوں میں حالیہ اضافے کو سختی سے مسترد کرتے ہوئے اسے عوام پر پیٹرول بم قرار دیا ہے اور ملک بھر میں احتجاجی تحریک شروع کرنے کا اعلان کیا ہے۔

اپنے بیان میں حافظ نعیم الرحمن کا کہنا تھا کہ پیٹرول کی قیمت کو 458 روپے تک لے جانا ظلم کی انتہا ہے جس سے غریب اور متوسط طبقہ شدید متاثر ہو رہا ہے۔

انہوں نے کہا کہ بار بار قیمتوں میں اضافہ عوام کو زندہ درگور کرنے کے مترادف ہے۔

انہوں نے مزید کہا کہ حالیہ اضافے سے بائیک سوار، ڈیلیوری ورکرز، طلبہ اور مزدور سب سے زیادہ متاثر ہوں گے جبکہ حکومت اپنی عیاشیاں کم کرنے کو تیار نہیں اور مہنگی گاڑیوں اور جہازوں کا بوجھ عوام پر ڈال رہی ہے۔

امیر جماعت اسلامی نے حکومت پر تنقید کرتے ہوئے کہا کہ پیٹرولیم لیوی ختم کرنے کے بجائے مزید ٹیکسز لگا دیے گئے ہیں جبکہ آئی ایم ایف کے دباؤ میں آکر عوام کو ریلیف دینے کے بجائے مزید مشکلات میں دھکیلا جا رہا ہے۔

ان کا کہنا تھا کہ آئی پی پیز کو اربوں روپے کی ادائیگیاں جاری ہیں اور کیپیسٹی پیمنٹس کے نام پر عوام کی جیبوں پر ڈاکا ڈالا جا رہا ہے۔

حافظ نعیم الرحمن نے اعلان کیا کہ آج سے ملک بھر میں احتجاجی تحریک کا آغاز کیا جا رہا ہے اور نوجوانوں سے اپیل کی کہ وہ باہر نکلیں اور حالات کی تبدیلی کے لیے جدوجہد کریں۔ انہوں نے خبردار کیا کہ حکمرانوں کو پیچھے ہٹنے پر مجبور کیا جائے گا۔

شہر قائد کے مختلف علاقوں میں پولیس نے جرائم پیشہ عناصر کے خلاف کارروائیاں تیز کرتے ہوئے مبینہ مقابلوں کے دوران 7 ملزمان کو گرفتار کر لیا، جن میں 5 زخمی بھی شامل ہیں، جبکہ 3 ساتھی فرار ہونے میں کامیاب ہو گئے۔

پولیس کے مطابق نیو کراچی انڈسٹریل ایریا میں رحمانیہ موڑ کے قریب مقابلے کے دوران 2 ڈاکوؤں کو گرفتار کیا گیا، جن میں زخمی ملزم واصف حسین کو اسپتال منتقل کیا گیا جبکہ دوسرا ملزم رحمت اللہ تھانے منتقل کر دیا گیا۔

گرفتار ملزمان کے قبضے سے اسلحہ، موبائل فونز، نقدی اور موٹرسائیکل برآمد کی گئی۔

دوسری کارروائی پاک کالونی کے علاقے میں کی گئی جہاں پولیس کا بدنام زمانہ بلال پپو گروپ کے کارندوں سے مبینہ مقابلہ ہوا۔ فائرنگ کے تبادلے میں 2 زخمیوں سمیت 4 ملزمان کو گرفتار کر لیا گیا، جن میں عقیل، فرید، عبدالواحد اور پیر محمد عرف مامو شامل ہیں۔

پولیس حکام کے مطابق ملزمان کے 3 ساتھی موقع سے فرار ہو گئے جن کی تلاش جاری ہے، جبکہ گرفتار افراد سے اسلحہ، موبائل فونز، نقدی اور منشیات بھی برآمد ہوئی ہیں۔

اسی طرح اورنگی ٹاؤن کے سیکٹر 12 میں ایک اور مقابلے کے دوران ایک ڈاکو سعید جیری کو زخمی حالت میں گرفتار کر لیا گیا، جسے فوری طور پر عباسی شہید اسپتال منتقل کیا گیا، جبکہ اس کے ساتھی فرار ہو گئے۔

شہر قائد میں اپریل کا مہینہ اچانک دسمبر جیسا محسوس ہونے لگا جہاں بادلوں کی خوفناک گرج چمک کے ساتھ مختلف علاقوں میں وقفے وقفے سے بارش کا سلسلہ جاری ہے۔

اطلاعات کے مطابق بلدیہ، مواچھ گوٹھ، ناظم آباد اور اورنگی ٹاؤن میں بارش نے موسم سرد بنا دیا، جبکہ لیاقت آباد، گولیمار، گلشن اقبال اور واٹر پمپ کے علاقوں میں بھی بارش ریکارڈ کی گئی۔

سرجانی ٹاؤن میں تیز ہواؤں اور گرج چمک کے ساتھ بارش نے شہریوں کو حیران کر دیا، جبکہ لیاری، صدر، ایم اے جناح روڈ اور آئی آئی چندریگر روڈ پر بھی بادل خوب برسے۔

اسی طرح منگھوپیر، سائٹ اور پاک کالونی کے اطراف میں تیز ہواؤں کے ساتھ بارش کا سلسلہ جاری رہا، جبکہ حب اور گردونواح میں گرج چمک کے ساتھ موسلا دھار بارش نے جل تھل ایک کر دیا۔

محکمہ موسمیات کے مطابق آئندہ چند گھنٹوں کے دوران مزید بارش کا امکان ہے، جس کے باعث نشیبی علاقوں میں پانی جمع ہونے کا خدشہ بھی ظاہر کیا جا رہا ہے۔