ڈونلڈ ٹرمپ کی ایران کو منگل کی رات تک دی گئی ڈیڈ لائن ختم ہونے کے قریب آنے کے ساتھ ہی امریکا اور ایران کے درمیان آخری لمحات میں مذاکراتی کوششیں تیز ہوگئیں۔

عالمی خبر رساں ادارے کے مطابق پاکستان ڈیڈ لائن کی آخری لمحات میں ایران اور امریکا کے درمیان ہونے والی بالواسطہ بات چیت میں اہم ثالثی کردار ادا کر رہا ہے۔

پاکستانی حکام نے دعویٰ کیا ہے کہ دونوں ممالک کے درمیان بات چیت کا جاری رہنا خود ایک بڑی پیش رفت ہے۔ دونوں مالک کو کسی نہ کسی حل تک پہنچنا ہوگا۔

ایک ایرانی عہدیدار نے بھی اس پیش رفت کو مثبت قرار دیتے ہوئے کہا کہ مزید امیدیں پیدا ہو رہی ہیں۔ پاکستان نے نہ صرف ان مذاکرات میں ثالثی کی بلکہ ممکنہ جنگ بندی کے بعد باضابطہ مذاکرات کی میزبانی کی پیشکش بھی کی ہے۔

اسلام آباد میں ایران کے سفیر نے سوشل میڈیا پر جاری بیان میں کہا کہ پاکستان کی نیک نیتی پر مبنی کوششیں جنگ روکنے کے لیے ایک حساس مرحلے میں داخل ہو رہی ہیں مزید پیش رفت کے لیے انتظار کریں۔

عالمی خبر رساں ادارے کی رپورٹ کے مطابق پاکستان کے علاوہ مصر اور ترکیہ کے سفارتکار بھی ایران اور امریکا کے درمیان کشیدگی کم کرنے کی کوشش کر رہے ہیں۔

امریکی نشریاتی ادارے ایکسیوز کے مطابق نائب صدر جے ڈی وینس، صدر ٹرمپ کے خصوصی ایلچی اسٹیو وٹکوف اور مشیر جیرڈ کشنر بھی معاہدہ کرنے کا مشورہ دے رہے ہیں۔

دوسری جانب اسرائیل، سعودی عرب اور متحدہ عرب امارات نے امریکا پر زور دیا ہے کہ اس وقت تک جنگ بندی قبول نہ کی جائے جب تک ایران کے کسی کے لیے خطرہ بننے کے خدشات ختم نہ ہوجائیں۔

پاکستان نے 1.43 ارب ڈالر کا قرض بروقت ادا کردیا۔

وزیر خزانہ کے مشیر خرم شہزاد کے سوشل میڈیا پلیٹ فارم ایکس پر جاری بیان کے مطابق 8 اپریل کو واجب الادا 1.3 ارب ڈالر کا یورو بانڈ مکمل طور پر ادا کر دیا گیا، جبکہ دیگر یورو بانڈز پر 126 ملین ڈالر سے زائد سود کی ادائیگی بھی کر دی گئی، جس سے مجموعی ادائیگی 1.42 ارب ڈالر سے تجاوز کرگئی۔

خرم شہزاد نے کہا کہ قرض کی تمام ادائیگیاں معمول کے مطابق اور بغیر کسی دباوٴ کے مکمل کی گئیں۔

انہوں نے کہا کہ اس پیش رفت سے ملکی معیشت میں استحکام اور بہتری کے آثار نمایاں ہو رہے ہیں، جبکہ زرمبادلہ ذخائر اور مالی گنجائش میں بھی اضافہ ہوا ہے۔

مشیر وزیر خزانہ کے مطابق سرمایہ کاروں کے اعتماد میں اضافہ ہوا ہے اور قرض مینجمنٹ میں نظم و ضبط مضبوط ہوا ہے، جس کے باعث پاکستان کی عالمی مالیاتی ساکھ بھی بہتر ہونا شروع ہو گئی ہے۔