ایرانی عوام نے صدر ڈونلڈ ٹرمپ کی ایرانی تہذیب و تمدن کو صفحہ ہستی سے مٹانے کی دھمکیوں کے جواب میں تنصیبات کے گرد انسانی زنجیر بنادیں۔

عالمی خبر رساں ادارے کے مطابق امریکی صدر ڈونلڈ ٹرمپ نے ایران کو دی گئی سخت دھمکیوں کے باوجود ایرانی عوام بڑی تعداد میں سڑکوں پر نکل آئے اور ملک بھر میں اہم تنصیبات کے تحفظ کے لیے انسانی زنجیریں قائم کر دیں۔

رپورٹس کے مطابق مختلف شہروں میں شہریوں نے اہم پلوں، بجلی گھروں اور دیگر حساس مقامات پر قومی پرچم اٹھا کر یکجہتی کا اظہار کیا۔

عوام کا کہنا تھا کہ وہ کسی بھی بیرونی دباؤ یا دھمکی سے خوفزدہ نہیں ہوں گے اور اپنے ملک کے دفاع کے لیے ہر حد تک جانے کو تیار ہیں۔

شرکا میں ہر عمر اور طبقے سے تعلق رکھنے والے افراد شامل تھے، جن میں بچے، بزرگ، خواتین اور طلبہ و طالبات بھی پیش پیش نظر آئے۔

شرکا نے کہا کہ وہ جنگی خطرات کے باوجود اپنی جانوں کی پروا کیے بغیر ان مقامات پر موجود ہیں تاکہ قومی تنصیبات کو کسی بھی ممکنہ حملے سے محفوظ رکھا جا سکے۔

دوسری جانب ایران کے سرکاری اور نیم سرکاری میڈیا نے ان مناظر کو عوامی اتحاد اور مزاحمت کی علامت قرار دیا ہے۔

ایرانی  حکام کا کہنا ہے کہ ملک کی خودمختاری اور اہم انفراسٹرکچر کے تحفظ کے لیے تمام وسائل بروئے کار لائے جا رہے ہیں۔

صدر ٹرمپ نے دھمکی دی ہے کہ منگل کی رات تک آبنائے ہرمز نہ کھولی گئی تو ایرانی تہذیب کو مکمل طور پر صفحہ ہستی سے مٹا دیں گے۔

عالمی خبر رساں ادارے کے مطابق ایران کی وزارتِ خارجہ کے ترجمان اسماعیل بقائی نے کہا ہے کہ ایک مہذب قوم کی منطق اور ثقافت بالآخر طاقت کے استعمال پر غالب آئے گی۔

سوشل میڈیا پر جاری اپنے بیان میں انھوں نے مزید کہا کہ ایک مہذب قوم کی ثقافت، منطق اور اپنے جائز مؤقف پر ایمان کی مضبوطی یقیناً ظلم و جبر کی منطق پر غالب آئے گی۔

ترجمان ایرانی وزارت خارجہ نے کہا کہ جو قوم اپنے راستے کی حقانیت پر مکمل یقین رکھتی ہو وہ اپنے حقوق اور جائز مفادات کے تحفظ کے لیے تمام تر صلاحیتوں اور وسائل بروئے کار لاتی ہے۔

سوشل میڈیا پر اپنی اس پوسٹ میں ترجمان ایرانی وزارت خارجہ اسماعیل بقائی نے #IranWillWin کا ہیش ٹیگ بھی استعمال کیا۔

ادھر نیویارک ٹائمز نے دعویٰ کیا ہے کہ ایران نے امریکا کے ساتھ مذاکرات منسوخ کرتے ہوئے پاکستان کو مطلع کیا ہے کہ اب وہ کسی قسم کے مذاکرات میں حصہ نہیں لے گا۔