وفاقی حکومت نے پاکستان ہاکی فیڈریشن کو سینئر ہاکی ٹیم کے دورہ انگلینڈ اور بیلجیم (پرو لیگ) کے لیے درکار تمام فنڈز جاری کردیے۔

پاکستان ہاکی فیڈریشن نے حکومت کے اس اقدام کو سراہتے ہوئے اسے قومی کھیل کی بحالی کے لیے ایک سنگ میل قرار دیا اور حکومت کے غیر متزلزل تعاون پر اسکا شکریہ ادا کیا ہے۔
​
پی ایچ ایف نے اپنے بیان میں کہا کہ فنڈز کی فراہمی سے قومی کھلاڑیوں کو بین الاقوامی پلیٹ فارم پر اپنی صلاحیتوں کے جوہر دکھانے کا بھرپور موقع ملے گا۔

​پی ایچ ایف کی جانب سے حکومت کو یقین دلایا گیا ہے کہ ان وسائل کا شفاف اور مؤثر استعمال کیا جائے گا تاکہ عالمی سطح پر پاکستان ہاکی کا وقار بلند کیا جا سکے۔

بیان میں کہا گیا کہ ہمارے ہیروز قوم کا سر فخر سے بلند کرنے کے لیے پوری طرح تیار ہیں جبکہ دورے کے تفصیلی شیڈول اور میچوں کی تفصیلات کا اعلان جلد کر دیا جائے گا۔

پاکستان ہاکی فیڈریشن نے مزید کہا کہ ​ہم حکومت کے اس اعتماد پر ان کے مشکور ہیں اور ان وسائل کو پاکستان ہاکی کی عظمتِ رفتہ کی بحالی کے لیے بروئے کار لائیں گے۔

وزیراعلیٰ سندھ نے کراچی سیف سٹی پروجیکٹ فیز ٹو کی منظوری دے دی جس کے تحت شہر میں مجموعی طور پر 2 ہزار 300 سے زائد اسمارٹ کیمرے نصب کیے جائیں گے۔

وزیراعلیٰ سندھ سید مراد علی شاہ  کی زیر صدارت کراچی سیف سٹی پراجیکٹ فیز ٹو کے حوالے سے اجلاس منعقد ہوا جس میں صوبائی وزیر داخلہ ضیاء الحسن لنجار، چیف سیکریٹری آصف حیدر شاہ، آئی جی پولیس جاوید اوڈھو اور دیگر  متعلقہ حکام  شریک ہوئے۔

وزیر اعلیٰ سندھ مراد علی شاہ نے اجلاس میں گفتگو کرتے ہوئے کہا کہ سیف سٹی منصوبہ عوام  کی سلامتی اور جرائم کے تدارک کے لیےانتہائی ضروری ہے، شہریوں کے جان و مال کی حفاظت و تحفظ  حکومت کی اولین ذمہ داری ہے، جدید ٹیکنالوجی کی مدد سے حفاظتی اقدامات کو مزید موثر بنائیں گے، منصوبے سے شہر  کی سیکیورٹی، نگرانی اور قانون نافذ کرنے والے اداروں کی صلاحیت میں مزید اضافہ ہوگا، ٹیکنالوجی کا موثر استعمال جدید دور کا اہم تقاضہ ہے۔

اجلاس میں متعلقہ حکام نے وزیر اعلیٰ سندھ کو بریفنگ میں بتایا کہ سیف سٹی فیز ٹو کے تحت شہر میں مجموعی طور پر 2 ہزار 300 سے زائد اسمارٹ کیمرے نصب کیے جائیں گے، 870 عمومی نگرانی، 1,300 آٹومیٹک نمبر پلیٹ ریکگنیشن اور چہرے کی شناخت سے لیس  ہوں گے، 80 ٹریفک نفاذ ،56 موبائل سرویلنس یونٹس ،8  ٹریفک سگنل مانیٹرنگ کے لیے  ہوں گے۔

بریفنگ میں بتایا گیا کہ کیمرے کراچی کے مختلف اضلاع میں نصب کیے جائیں گے، ضلع جنوبی میں 322 کیمرے، ضلع شرقی 220، کورنگی 27، کیماڑی17، ملیر16 اور ضلع غربی میں 1 کیمرا نصب کیا جائے گا، منصوبے کی مجموعی لاگت 9.98 ارب روپے ہے۔ منصوبہ کی تکمیل  آئندہ 12 ماہ کے دوران  متوقع ہے جبکہ منصوبے کا باقاعدہ آغاز مئی 2026 میں کیا جائے گا، منصوبے میں  9 پوائنٹس آف پریزنس، سولر اور جنریٹر بیک اپ، اسمارٹ سرویلنس ٹاور، 50 پبلک پینک بٹن، 8 رسپانس گاڑیاں اور 10 سرویلنس ڈرونز بھی شامل ہیں۔

وزیر اعلیٰ سندھ نے کہا کہ یہ صرف ایک ترقیاتی منصوبہ نہیں بلکہ عوامی تحفظ  اور قومی سلامتی میں ایک اہم سرمایہ کاری ہے، وزیراعلیٰ سندھ نے متعلقہ اداروں کو کام تیز کرنے کی ہدایت کرتے ہوئے کہا کہ منصوبہ بروقت مکمل ہونا چاہیے، تاخیرسے لاگت  میں اضافہ  ہونے کا خدشہ ہے، وزیراعلیٰ نے سندھ سیف سٹی اتھارٹی  کو تکنیکی عملے کی شفاف اور میرٹ پر بھرتی  کی بھی منظوری دے دی۔ 

اجلاس میں حیدرآباد، سکھر، لاڑکانہ، میرپورخاص اور شہید بینظیرآباد میں بھی سیف سٹی منصوبے شروع کرنے کی تجویز پر غور کیا گیا،  وزیر اعلیٰ نے کہا کہ کراچی کے علاوہ دیگر ڈویژنل ہیڈکوارٹرز میں 780 کیمرے نصب کرنے  کے منصوبے پر 3.15 ارب روپے لاگت  آئے گی، صوبے کے تمام سیف سٹی منصوبوں کو ایک مربوط نظام  یعنی سندھ سیف سٹیز اتھارٹی کےذریعے چلایا جائے، مربوط کمانڈ اینڈ کنٹرول سسٹم ہی مؤثر سیکیورٹی کی ضمانت ہے۔

مراد علی شاہ نے کہا کہ سیف سٹی منصوبہ نہ صرف جرائم کی روک تھام میں مدد گار ثابت ہوگا بلکہ ٹریفک مینجمنٹ اور ہنگامی خدمات کو بھی بہتر بنائے گا، سندھ حکومت کا کراچی کو ایک جدید، پُرامن اور مضبوط معاشی حب بنانے کا عزم  ضرور شرمندہ تعبیر ہوگا۔

تہران: ایرانی صدر مسعود پزشکیان نے کہا ہے کہ لبنان میں اسرائیلی حملے جنگ بندی معاہدے کی کھلی خلاف ورزی ہیں اور یہ اقدامات خطے میں امن کی کوششوں کو نقصان پہنچا سکتے ہیں۔

ایرانی صدر نے شہید سپریم لیڈر علی خامنہ ای کے چہلم کے موقع پر ایک بڑے عوامی اجتماع سے خطاب کرتے ہوئے کہا کہ لبنان پر جاری حملے نہ صرف غیر ذمہ دارانہ ہیں بلکہ جاری جنگ بندی مذاکرات کو بھی بے معنی بنا سکتے ہیں۔

انہوں نے واضح کیا کہ ایران لبنانی عوام کو تنہا نہیں چھوڑے گا۔

مسعود پزشکیان نے مزید کہا کہ یہ حملے دھوکا دہی کی علامت ہیں اور اس سے ظاہر ہوتا ہے کہ بعض فریقین ممکنہ معاہدوں کے لیے سنجیدہ نہیں ہیں۔ انہوں نے زور دیا کہ خطے میں پائیدار امن کے لیے جنگ بندی کی مکمل پاسداری ضروری ہے۔

دوسری جانب ترک صدر طیب اردگان نے ایرانی صدر سے ٹیلیفون پر رابطہ کیا اور اس بات پر زور دیا کہ پاکستان میں ہونے والے امریکا اور ایران کے درمیان مذاکرات کو خطے میں دیرپا امن کے قیام کے لیے مؤثر طریقے سے استعمال کیا جانا چاہیے۔

تجزیہ کاروں کے مطابق ایران، ترکی اور دیگر علاقائی ممالک کے بیانات اس بات کی نشاندہی کرتے ہیں کہ مشرق وسطیٰ میں کشیدگی کم کرنے کے لیے سفارتی کوششیں تیز ہو رہی ہیں، تاہم زمینی صورتحال اب بھی پیچیدہ ہے۔