نوابشاہ کے تھانہ بی سیکشن کی حدود جام صاحب روڈ قینچی پل کے قریب رشتے کے تنازع پر دو گروپوں کے درمیان جھگڑا خونی تصادم میں تبدیل ہوگیا۔

پولیس کے مطابق فائرنگ کے نتیجے میں امید علی خاصخیلی جاں بحق ہوگئے، جبکہ ان کا نوجوان بیٹا جنید خاصخیلی شدید زخمی ہوگیا۔

زخمی کو فوری طور پر طبی امداد کے لیے پیپلز میڈیکل کالج اسپتال منتقل کیا گیا جہاں اسے علاج فراہم کیا جا رہا ہے، جبکہ مقتول کی لاش بھی اسپتال منتقل کر دی گئی۔

پولیس کا کہنا ہے کہ جھگڑے میں ملوث دونوں گروپوں کا تعلق خاصخیلی برادری سے ہے، اور واقعے کے بعد برادری کے افراد کی بڑی تعداد اسپتال پہنچ گئی جس کے باعث وہاں صورتحال کشیدہ رہی۔

علاقے میں ممکنہ کشیدگی کے پیش نظر پولیس کی بھاری نفری تعینات کر دی گئی ہے اور گشت بڑھا دیا گیا ہے، جبکہ واقعے کی مزید تحقیقات جاری ہیں۔

امریکی صدر ڈونلڈ ٹرمپ نے کہا ہے کہ وہ ایران کے ساتھ جنگ نہیں چاہتے تھے، تاہم اس کے ایٹمی پروگرام کے باعث حالات اس نہج پر پہنچے کہ لڑائی ناگزیر ہوگئی۔

ایک تقریب سے خطاب کرتے ہوئے ٹرمپ نے کہا کہ ایران کے ساتھ جاری کشیدگی بالآخر خوش اسلوبی سے ختم ہو جائے گی اور امن کا قیام ضروری ہے۔

انہوں نے واضح کیا کہ ایران کو کسی صورت ایٹمی ہتھیار رکھنے کی اجازت نہیں دی جائے گی۔

انہوں نے دعویٰ کیا کہ ایک موقع پر امریکی طیارے پر 111 راکٹ داغے گئے تاہم امریکی دفاعی نظام نے تمام حملے ناکام بنا دیے۔

ان کا کہنا تھا کہ امریکی فوج دنیا کی بہترین فوج ہے اور اسے مزید مضبوط بنایا جا رہا ہے۔

داخلی سیاست پر بات کرتے ہوئے ٹرمپ نے کہا کہ ریپبلکنز کو مڈ ٹرم انتخابات میں کامیابی حاصل کرنا ہوگی جبکہ انہوں نے یہ بھی عندیہ دیا کہ وہ ٹپس (انعامی رقم) پر ٹیکس عائد کرنے کے حق میں نہیں ہیں۔

لبنان میں جنگ بندی سے متعلق اظہار خیال کرتے ہوئے ٹرمپ نے کہا کہ بالآخر امن ہی واحد راستہ ہے اور امید ظاہر کی کہ حزب اللہ معقول رویہ اختیار کرے گی۔

کراچی کے علاقے سائٹ بی میں بلدیہ نمبر دو کٹ کے قریب پولیس اور ملزمان کے درمیان مبینہ مقابلہ ہوا، جس کے نتیجے میں ایک ڈاکو ہلاک جبکہ اس کا ساتھی فرار ہونے میں کامیاب ہوگیا۔

پولیس کے مطابق ہلاک ہونے والے ملزم کی لاش کو ضابطے کی کارروائی کے لیے سول اسپتال کراچی منتقل کر دیا گیا ہے جہاں اس کی شناخت عبدالرؤف کے نام سے کی گئی ہے۔

پولیس کا کہنا ہے کہ فرار ہونے والے ملزم کی تلاش کے لیے علاقے میں سرچ آپریشن جاری ہے، جبکہ واقعے کی مزید تحقیقات بھی کی جا رہی ہیں۔