سوات کے علاقے رحیم آباد میں کار پر فائرنگ کے نتیجے میں تین افراد جاں بحق ہو گئے۔

پولیس کے مطابق لاشوں کو سیدو شریف اسپتال منتقل کر دیا گیا ہے، جبکہ فائرنگ کی وجوہات تاحال معلوم نہیں ہو سکیں۔

پولیس نے واقعے کی تحقیقات شروع کر دی ہیں۔

خیبر پختونخوا کے میڈیکل ٹیچنگ اداروں میں نئے قوانین کے تحت مقررہ اوقاتِ کار کی خلاف ورزیوں کا انکشاف ہوا ہے۔

ایم ٹی آئی قوانین کے نفاذ کے باوجود ہسپتالوں میں پرانے اوقات کار رائج تھے جس پر پالیسی بورڈ نے تشویش کا اظہار کرتے ہوئے تمام متعلقہ ایم ٹی آئیز اداروں کو طبی عملے کو صبح 8 بجے سے سہہ پہر 4 بجے تک ڈیوٹی پر موجودگی کو لازمی قرار دے دیا۔

اس سلسلے میں پالیسی بورڈ نے ہسپتالوں کو ہدایات جاری کر دی ہیں۔ پالیسی بورڈ خیبر پختونخوا کی جانب سے جاری مراسلے کے مطابق چیئرمین ڈاکٹر نوشیروان برکی نے مختلف ایم ٹی آئیز کے حالیہ جائزے کے دوران یہ بات نوٹ کی کہ متعدد ادارے ایم ٹی آئی آر ایکٹ اور متعلقہ قواعد و ضوابط کی خلاف ورزی کر رہے ہیں۔

مراسلے میں کہا گیا ہے کہ بیشتر اسپتال اب بھی پرانے اوقاتِ کار یعنی صبح 8 بجے سے دوپہر 2 بجے تک، ہفتے میں 6 دن کام کر رہے ہیں جس کے باعث دوپہر 2 بجے کے بعد سوائے ہنگامی حالات کے اسپتال عملاً بند ہو جاتے ہیں اور عملہ صرف 6 گھنٹے یومیہ ڈیوٹی انجام دے رہا ہے۔

مراسلے میں واضح کیا گیا ہے کہ قواعد (آئٹم 23) کے مطابق ملازمین کے باقاعدہ اوقاتِ کار صبح 8 بجے سے شام 4 بج کر 30 منٹ تک ہوں گے جس میں 30 منٹ کا وقفہ برائے دوپہر کا کھانا شامل ہے جبکہ ہفتے میں 5 دن کام کیا جائے گا۔

تاہم شفٹوں میں کام کرنے والے شعبہ جات کے لیے اوقات مختلف ہو سکتے ہیں کیونکہ اسپتال تین شفٹوں میں کام کرتے ہیں۔ اعلامیے میں یہ بھی کہا گیا ہے کہ پالیسی بورڈ نے تمام بورڈ آف گورنرز سے کہا ہے کہ وہ اپنے اپنے اداروں میں ان اوقاتِ کار پر عملدرآمد کی تصدیق کریں اور اسے یقینی بنائیں۔

کوئٹہ میں خواتین امتحانی مراکز سے متعلق اہم فیصلہ سامنے آیا ہے۔ محکمہ تعلیم بلوچستان نے ایچ ایس ایس سی (انٹر) سالانہ امتحانات 2026 کے دوران خواتین مراکز میں مرد افسران اور اہلکاروں کے داخلے پر مکمل پابندی عائد کر دی ہے۔

نوٹیفکیشن کے مطابق کسی بھی مرد افسر یا مانیٹرنگ ٹیم کے رکن کو خواتین امتحانی مراکز میں داخلے، معائنے یا انسپکشن کی اجازت نہیں ہوگی، جبکہ تمام نگرانی کا کام صرف خواتین افسران انجام دیں گی۔

یہ فیصلہ اس واقعے کے بعد سامنے آیا جب بورڈ آف انٹرمیڈیٹ اینڈ سیکنڈری ایجوکیشن کوئٹہ کی جانب سے نقل کی روک تھام کے لیے مرد اہلکاروں کو خواتین مراکز میں بھیجا گیا، جس پر طالبات اور عملے میں تشویش پیدا ہوئی اور معاملہ سوشل میڈیا پر بھی زیر بحث آیا۔

محکمہ تعلیم کے مطابق ڈائریکٹر کالجز اور چیئرمین بی بی آئی ایس ای کو اس فیصلے پر مکمل عملدرآمد یقینی بنانے کی ہدایت دی گئی ہے، جبکہ خلاف ورزی کی صورت میں سخت تادیبی کارروائی ہوگی۔

حکام کا کہنا ہے کہ اس اقدام کا مقصد امتحانی عمل کو شفاف بنانے کے ساتھ ساتھ خواتین طالبات کے لیے محفوظ، باوقار اور پرسکون ماحول فراہم کرنا ہے۔

سوشل میڈیا صارفین نے اس فیصلے کو طالبات کے تحفظ کی جانب مثبت قدم قرار دیا ہے، جبکہ بعض حلقوں کا کہنا ہے کہ نقل کی روک تھام کے اقدامات جاری رہنے چاہئیں لیکن انہیں صرف خواتین عملے کے ذریعے ہی انجام دیا جائے۔