امریکی اخبار وال اسٹریٹ جرنل نے دعویٰ کیا ہے کہ امریکا بین الاقوامی سمندروں میں موجود ایرانی آئل ٹینکروں اور تجارتی جہازوں پر قبضہ کرنے کی تیاری کر رہا ہے، جس سے خطے میں کشیدگی مزید بڑھنے کا خدشہ ظاہر کیا جا رہا ہے۔

رپورٹ کے مطابق امریکا اس اقدام کے ذریعے ایران پر دباؤ ڈالنا چاہتا ہے تاکہ وہ آبنائے ہرمز کو دوبارہ کھول دے اور اپنے جوہری پروگرام کے حوالے سے امریکا کو رعایتیں دے۔

دوسری جانب ایران کی پاسدارانِ انقلاب نے واضح کیا ہے کہ آبنائے ہرمز پر نیا نظام نافذ کیا جائے گا، جس کے تحت اس اہم سمندری راستے سے گزرنے والے ہر جہاز کو ایرانی بحریہ سے اجازت لینا لازمی ہوگا۔

پاسدارانِ انقلاب کے مطابق تمام تجارتی جہاز ایران کی جانب سے طے کیے گئے مخصوص راستوں پر سفر کریں گے، جبکہ غیر ملکی جنگی جہازوں کے داخلے پر سخت پابندی عائد ہوگی۔

ایرانی بحریہ کے سربراہ ریئر ایڈمرل شہرام ایرانی نے امریکی پالیسی پر تنقید کرتے ہوئے کہا کہ صدر ٹرمپ نے دراصل ایران نہیں بلکہ اپنے اتحادیوں کی ناکہ بندی کی ہے۔ ان کا کہنا تھا کہ ٹرمپ کے بیانات کو سنجیدگی سے نہیں لیا جا رہا۔

واضح رہے کہ ایران نے لبنان میں جنگ بندی کے بعد آبنائے ہرمز کھولنے کا عندیہ دیا تھا، تاہم بعد ازاں ایران نے مؤقف اختیار کیا کہ جب تک امریکا اپنے غیر قانونی اقدامات ختم نہیں کرتا، اس وقت تک یہ اہم آبی گزرگاہ مکمل طور پر بحال نہیں کی جائے گی۔

ماہرین کے مطابق اگر اس کشیدگی میں مزید اضافہ ہوا تو عالمی تیل کی ترسیل اور معیشت پر گہرے اثرات مرتب ہو سکتے ہیں۔

پنجاب فوڈ اتھارٹی نے علی الصبح راولپنڈی میں ناقص گوشت کے خلاف بڑی کارروائی کرتے ہوئے 800 کلو مضرِ صحت گوشت تلف کردیا۔

ترجمان کے مطابق خفیہ اطلاع پر ہولی فیملی اسپتال کے قریب ایک میٹ شاپ کی چیکنگ کی گئی، جہاں ویٹرنری ڈاکٹر نے گوشت کا معائنہ کرکے اسے انسانی استعمال کے لیے غیر موزوں قرار دیا۔

حکام کا کہنا ہے کہ گوشت میں پانی کی ملاوٹ پائی گئی اور وہ بدبو دار بھی تھا، جس پر فوری طور پر اسے تلف کر دیا گیا۔ مزید کارروائی کرتے ہوئے دکان کے مالک کے خلاف مقدمہ درج کر لیا گیا ہے۔

پنجاب فوڈ اتھارٹی کے مطابق صوبہ بھر میں ناقص اور مضرِ صحت گوشت کے خلاف کریک ڈاؤن جاری رہے گا۔

اٹک کے علاقے بسال میں کرکٹ میچ کے دوران ایک افسوسناک واقعہ پیش آیا جہاں نوجوان کھلاڑی دل کا دورہ پڑنے سے جاں بحق ہوگیا۔

ریسکیو حکام کے مطابق پنڈی گھیب کے گاؤں کسراں سے تعلق رکھنے والا نوجوان کرکٹر امان اللہ ریلوے گراؤنڈ بسال میں میچ کھیل رہا تھا کہ بیٹنگ کے دوران اچانک دل کا دورہ پڑنے سے گر پڑا اور جانبر نہ ہوسکا۔

ابتدائی اطلاعات کے مطابق مقامی افراد نے فوری طور پر اسے اسپتال منتقل کرنے کی کوشش کی تاہم وہ راستے میں ہی دم توڑ گیا۔