Source link

کراچی پریس کلب کے سیکریٹری اسلم خان کی سربراہی میں گورننگ باڈی کے ارکان اور سابق صدر سعید سربازی نے پیر کو لیاری ڈویلپمنٹ اتھارٹی کے تحت دیہہ مندرہ میں نئے ممبران کو الاٹ کیے گئے پلاٹس کی جگہ کا دورہ کیا۔

دورے کے بعد وفد نے ایل ڈی اے حکام سے ملاقات کی، جہاں مجلسِ عاملہ کو سپرنٹنڈنٹ انجینئر ولید بشیر اور دیگر افسران نے تفصیلی بریفنگ دی۔

بریفنگ کے دوران بتایا گیا کہ 639 ممبران کے پلاٹس سے متعلق پی سی ون کابینہ کی منظوری کے بعد اب حتمی مراحل میں داخل ہو چکا ہے۔

اس کے تحت جنگل کی صفائی (جنگل کٹنگ)، ٹوپوگرافی، میپنگ اور ڈیمارکیشن کا کام مرحلہ وار مکمل کیا جائے گا۔ 125 ایکڑ پر مشتمل یہ اراضی بے نظیر ٹاؤن سے متصل ہے اور بلاک 68 سے تقریباً چار کلومیٹر کے فاصلے پر واقع ہے جبکہ مرکزی سڑک سے بھی منسلک ہے۔

حکام کا کہنا تھا کہ کوشش کی جا رہی ہے کہ یہ تمام مراحل موجودہ مالی سال کے اندر مکمل کر لیے جائیں۔

بلاک 68 کے حوالے سے ایل ڈی اے حکام نے بتایا کہ وہاں ممبران کے لیے مکانات کی تعمیر میں کوئی قانونی رکاوٹ نہیں ہے، جو بھی ممبر اپنے واجبات ادا کر کے تعمیراتی کام شروع کرنا چاہے، ایل ڈی اے اس سلسلے میں ہر ممکن تعاون فراہم کرے گا۔

مزید برآں، بلاک 68 اور بلاک 3 کے لیے ترتیب دیے گئے ترقیاتی منصوبے بھی اسی مالی سال میں مکمل کیے جائیں گے۔

حکام کے مطابق لیز اور میوٹیشن کا عمل مکمل کر لیا گیا ہے، تاہم انہوں نے اس بات پر تشویش کا اظہار کیا کہ طے شدہ 20 فیصد رقم کا بڑا حصہ تاحال واجب الادا ہے۔ اس سلسلے میں ممبران کو ہدایت کی گئی ہے کہ وہ تین ماہ کے اندر اپنی ادائیگیاں مکمل کریں تاکہ اسکیم پر کام تیزی سے آگے بڑھایا جا سکے۔

اجلاس میں یہ بھی طے پایا کہ ایل ڈی اے حکام ہر 15 دن بعد ممبران کی رہنمائی اور معاونت کے لیے کراچی پریس کلب میں دستیاب ہوں گے، جبکہ پیش رفت کا جائزہ لینے کے لیے ہر ماہ فالو اپ اجلاس بھی منعقد کیا جائے گا۔

ممبران کی سہولت کے لیے واجب الادا رقوم کی تفصیلات نوٹس بورڈ پر آویزاں کی جائیں گی۔



Source link

انسپکٹر جنرل پولیس بلوچستان نے اختیارات کا ناجائز استعمال اور ریکارڈ میں ردوبدل کرنے کے الزام میں قائم مقام ڈی ایس پی قلعہ سیف اللہ کو ملازمت سے برطرف کر دیا۔

سینٹرل پولیس آفس کوئٹہ سے جاری حکم نامے کے مطابق عاشق خان خٹک پر الزام تھا کہ انہوں نے 2023 میں تھانہ انڈسٹریل کوئٹہ میں انوسٹی گیشن افسر تعیناتی کے دوران مقدمے کی تفتیش میں حقائق میں ردوبدل، غلط انجن اور چیسیس نمبرز درج کرنے اور شواہد میں تضاد پیدا کیا جس پر انکوائری کمیٹی تشکیل دی جس کی رپورٹ کی روشنی میں ان پر الزامات ثابت ہوئے ہیں۔

انکوائری میں یہ بھی سامنے آیا کہ افسر نے جائے وقوعہ سے متعلق اہم شواہد، تصاویر اور ویڈیوز کو نظر انداز کیا اور غیر پیشہ ورانہ طرزِ عمل اختیار کیا۔

حکم نامے کے مطابق مذکورہ کیس میں مدعی کی شکایت پر درج مقدمے کی تفتیش کے دوران افسر نے ایک مختلف موٹر سائیکل کے کوائف شامل کیے، جس کے باعث کیس مشکوک ہوگیا جبکہ عدالت نے مقدمے میں نامزد ملزمان کو بری کر دیا۔

محکمانہ انکوائری میں افسر کو غفلت، بددیانتی اور دانستہ بے ضابطگیوں کا مرتکب قرار دیا گیا۔

انہیں شوکاز نوٹس جاری کر کے ذاتی صفائی کا موقع بھی دیا گیا، تاہم وہ الزامات کا تسلی بخش جواب دینے میں ناکام رہے۔

حکام کے مطابق تمام شواہد اور ریکارڈ کا جائزہ لینے کے بعد پولیس افسر کے خلاف الزامات ثابت ہونے پر پولیس ایفیشنسی اینڈ ڈسپلن رولز 1975 کے تحت انہیں ملازمت سے برطرف کرنے کی سزا سنائی گئی ہے۔



Source link