شمالی کوریا نے ایک بار پھر بیلسٹک میزائلوں کا تجربہ کرتے ہوئے متعدد میزائل فائر کیے ہیں، جس کے بعد خطے میں کشیدگی میں اضافہ دیکھنے میں آ رہا ہے۔

شمالی کوریا کی فوج کے مطابق یہ میزائل شمالی کوریا کے مشرقی ساحلی شہر سن پو کے قریب سے مقامی وقت کے مطابق صبح 6 بج کر 10 منٹ پر فائر کیے گئے۔ میزائل تقریباً 140 کلومیٹر تک پرواز کرنے کے بعد سمندر میں جا گرے۔

رپورٹس کے مطابق یہ رواں ماہ کے دوران شمالی کوریا کا چوتھا جبکہ سال 2026 کا ساتواں میزائل تجربہ ہے، جو اس بات کی نشاندہی کرتا ہے کہ پیانگ یانگ اپنی عسکری صلاحیتوں کو مسلسل بڑھا رہا ہے۔

جاپان کی حکومت نے بھی تصدیق کی ہے کہ میزائل جزیرہ نما کوریا کے مشرقی ساحل کے قریب سمندر میں گرے، تاہم کسی نقصان کی اطلاع نہیں ملی۔

میزائل تجربے کے بعد جنوبی کوریا کے صدارتی دفتر بلیو ہاؤس نے فوری ہنگامی سکیورٹی اجلاس طلب کیا۔ حکام نے ان تجربات کو اشتعال انگیزی قرار دیتے ہوئے کہا کہ یہ اقوام متحدہ کی قراردادوں کی کھلی خلاف ورزی ہیں۔

غیر ملکی خبررساں اداروں کے مطابق ابھی یہ واضح نہیں ہو سکا کہ فائر کیے گئے میزائل کس نوعیت کے تھے، تاہم سنپو وہ اہم مقام ہے جہاں آبدوزوں اور آبدوز سے داغے جانے والے بیلسٹک میزائلوں کے تجربات کیے جاتے ہیں۔

ماہرین کا کہنا ہے کہ اس قسم کے مسلسل میزائل تجربات خطے میں عدم استحکام کو بڑھا سکتے ہیں اور عالمی سطح پر سکیورٹی خدشات میں اضافہ کر سکتے ہیں۔

کراچی: ملیر رضا موبائل مارکیٹ کے قریب ٹریلر کی زد میں آکر موٹرسائیکل سوار ایک نوجوان جاں بحق، دوسرا زخمی ہوگیا۔

تفصیلات کے مطابق ملیر سٹی کے علاقے رضا موبائل مارکیٹ کے قریب ٹریلر کی ٹکر سے موٹرسائیکل سوار ایک شخص جاں بحق اور ایک زخمی ہوگیا، جاں بحق و زخمی ہونے والوں کو چھیپا ایمبولینس کے ذریعے جناح اسپتال منتقل کیا گیا۔

جاں بحق ہونے والے شخص کی شناخت 22 سالہ مظہر ولد جان محمد کے نام سے کی گئی جبکہ زخمی ہونے والے شخص نے اپنا نام 22 سالہ حمید عالم ولد گل زادہ بتایا۔

ایس ایچ او ملیر سٹی انسپکٹر ریاض بھٹو نے بتایا کہ جاں بحق و زخمی ہونے والے قائد آباد کے رہائشی ہیں، پولیس نے جاں بحق ہونے والے شخص کی لاش پولیس کارروائی کے بعد ورثا کے حوالے کردی۔

متوفی کی لاش غسل و کفن کے کے لیے چھیپا سردخانے منتقل کی گئی، پولیس نے حادثے کے ذمے دار ٹریلر کے ڈرائیور کو موقع پر موجود شہریوں کی مدد سے گرفتار کرکے ٹریلر کو قبضے میں لے لیا۔

علیمہ خان کے خلاف 26 نومبر احتجاج کیس سماعت آج ہوگی۔

راولپنڈی میں انسداد دہشت گردی عدالت کے جج امجد علی شاہ سبح 10 بجے کیس کی سماعت کریں گے، آج عدالت نے آخری گواہ کو طلب کر رکھا ہے۔

وکلائے صفائی آخری گواہ تفتیشی آفیسر پر جرح کریں گے، ضلع کچہری راولپنڈی میں مقدمات کی سماعت باعث سیکورٹی کے سخت انتظامات کئے گئے ہیں۔