کراچی: کورنگی سو کوارٹر کے قریب موٹرسائیکل سوار برقع پوش ملزمان کی فائرنگ سے سیاسی جماعت کا علاقائی عہدیدار جاں بحق ہوگیا۔

تفصیلات کے مطابق زمان ٹاؤن کے علاقے کورنگی سو کوارٹر سیکٹر 50/C ملائی ہوٹل کے قریب برقع پوش موٹرسائیکل سوار ملزمان کی اندھا دھند فائرنگ سے ایک شخص جاں بحق ہوگیا جس کی لاش جناح اسپتال منتقل کی گئی۔

 ترجمان کراچی پولیس کے مطابق مقتول کی شناخت 32 سالہ یاسین ولد امین کے نام سے کی گئی، مقتول کے کزنز اور دیگر رشتے داروں نے جناح اسپتال میں ایکسپریس سے گفتگو کرتے ہوئے بتایا کہ مقتول مکان نمبر 1-770 ، سیکٹر 48/F محلہ اتحاد کالونی کورنگی کا رہائشی اور 3 بچوں کا باپ تھا، مقتول فشری میں مچھلی کی فیکٹری کا ٹھیکیدار تھا جبکہ وہ ایم کیو ایم پاکستان کورنگی یوسی 8 کا علاقائی ذمے دار تھا۔

عینی شاہدین کے مطابق ایک موٹرسائیکل پر دو افراد آئے جن میں سے ایک ہیلمٹ لگائے ہوئے تھا جبکہ دوسرا شخص برقع پہنے ہوئے تھا، برقع پوش نے موٹرسائیکل سے اتر کر اندھا دھند فائرنگ کی، گولیاں یاسین کے سر پر لگیں جب وہ اٹھ کر بھاگنے کی کوشش کر رہا تھا تو عقب سے کمر پر بھی گولیاں مار دیں اور ملزمان فرار ہوگئے۔

فرار ہونے والوں ملزمان کے بیک اپ میں بھی ایک موٹرسائیکل پر دو ملزمان تھے جو ان کے ساتھ ہی فرار ہوگئے، واقعے کے وقت علاقے میں بجلی نہیں تھی جس کے باعث موٹرسائیکلوں کے نمبر یا ملزمان کے چہرے کسی نے نہیں دیکھے، مقتول کی کسی سے نہ تو دشمنی تھی اور نہ ہی کسی سے لین دین کا تنازع تھا، واقعہ ٹارگٹ کلنگ کا شاخسانہ ہے۔

جاپان میں ایک فوجی مشق کے دوران ٹینک کے ذریعے غلطی سے ہونے والے فائر کے نتیجے میں تین فوجی ہلاک ہو گئے ہیں۔

میڈیا رپورٹس کے مطابق وزیر اعظم سانائے تاکائیچی نے کہا کہ جنوب مغربی اویٹا کے علاقے میں جاپان کی سیلف ڈیفنس فورسز کے زیر استعمال تربیتی گراؤنڈ میں ہونے والے غیر معمولی حادثے میں ٹینک نے غلطی سے گولاباری کی جس سے عملے کے تین افراد ہلاک اور ایک زخمی ہوگیا ہے۔

تاہم حادثہ کس وجہ سے پیش آیا اس کی تفصیلات کی تحقیقات جاری ہیں۔

وزیر اعظم نے اپنی دلی تعزیت پیش کرتے ہوئے لکھا کہ یہ انتہائی افسوسناک ہے کہ ایسا واقعہ پیش آیا۔

لاہور میں پولیس نے اپنی بیویوں کو قتل کرنے والے 2 شوہروں کو گرفتار کرلیا۔

تفصیلات کے مطابق ایس ایچ او کاہنہ نے ٹیم کے ہمراہ ضلع ساہیوال سے بیوی کے قتل میں ملوث ملزم آصف کو گرفتار کرلیا، ملزم کو جدید ٹیکنالوجی کی مدد سے ٹریس کیا گیا۔

پولیس کے مطابق مقتولہ صائمہ بی بی 5 بچوں کی ماں اور سادھوکی گاؤں میں رہائش پذیر تھی، صائمہ بی بی اور ملزم کے مابین اکثر گھریلو جھگڑا رہتا تھا۔

ملزم آصف نے ایک ہفتہ قبل اپنے ساتھی سے مل کر چھری سے بیوی کا گلا کاٹ کر قتل کیا، مرکزی ملزم قتل کے بعد ساتھی کے ہمراہ موقع سے فرار ہو گیا تھا، ملزم کو مزید تفتیش کیلئے انویسٹی گیشن حکام کے حوالے کردیا گیا جبکہ اسکے دوسرے ساتھی کی تلاش میں چھاپے مارے جارہے ہیں۔

دوسری جانب پولیس نے شاہدرہ کے علاقہ میں اسکول ٹیچر بیوی کو قتل کرنیوالے سفاک شوہر کو گرفتار کرلیا،  ڈی آئی جی انویسٹی گیشن سید ذیشان رضا نے قتل کی اس سنگین واردات کا نوٹس لیا تھا۔

ایس پی سٹی فرحت عباس کی سربراہی میں پولیس ٹیم کو ملزم کی گرفتاری کا ٹاسک دیا گیا، انچارج انویسٹی گیشن تھانہ شاہدرہ انسپکٹر اختر علی نے اپنی ٹیم کے ہمراہ کارروائی کر کے ملزم کو گرفتار کر لیا۔

ایس پی انویسٹی گیشن سٹی کے مطابق ملزم نے گھریلو ناچاقی پر فائرنگ کر کے اپنی بیوی کو بے دردی سے قتل کر دیا تھا جس کے بعد وہ موقع سے فرار ہوگیا تھا، ملزم کو پیشہ وارانہ مہارت اور ہیومن انٹیلیجنس کی مدد سے گرفتار کیا گیا۔