Source link

پشاور میں ٹک ٹاک نے ایک اور معصوم بچے کی جان لے لی، تہکال پلوسئی میں پانچویں جماعت کے طالب علم اویس نے گھر میں شیشے کے سامنے پستول رکھا جو ویڈیو بناتے ہوئے چل گیا اور بچے کی جان چلی گئی۔

ایکسپریس نیوز کے مطابق کم سن طالب علم کے پاس اسکول کے واٹس ایپ گروپ میں چیزوں کو شئیر کیا جاتا تھا جس کی وجہ سے بچے کے پاس موبائل فون موجود ہوتا تھا۔

جس روز واقعہ پیش آیا اس دن  اویس ٹک ٹاک کے لیے ویڈیو بنا رہا تھا، شیشے کے قریب پستول رکھا تھا جو اسے چلانا نہیں آتا تھا جو غلطی سے بچے سے چل گیا جس سے اچانک یہ حادثہ پیش آگیا۔

اویس کے والد کا کہنا تھا گھر میں موجود دیگر بچے اسکول گئے ہوئے تھے لیکن چھوٹی سی غلطی نے بیٹے کی جان لے لی۔

واقعے کے بعد سے پورا خاندان غم میں مبتلا ہے، بچے کے والد سیف الرحمان کے مطابق یہ لمحہ ہمارے خاندان کے لئے بہت دردناک ہے۔

واضح رہے کہ سوشل میڈیا ایپ ٹک ٹاک پر ویڈیوز بنانے کے رجحان نے خطرناک رخ اختیار کرلیا ہے، جہاں نوجوان اور کم عمر بچے محض چند سیکنڈ کی ویڈیو کو وائرل کرنے کی خاطر اپنی جانوں کو داؤ پر لگانے لگے ہیں۔ حالیہ واقعات میں اسلحہ کی نمائش اور اس کے غیر محتاط استعمال کے دوران حادثات اور قیمتی جانوں کے ضیاع کے کیسز سامنے آئے ہیں، جس پر ماہرین نے شدید تشویش کا اظہار کیا ہے۔

ماہرین کے مطابق کم عمر بچوں میں سوشل میڈیا کے غیر ذمہ دارانہ استعمال سے نہ صرف ذہنی و اخلاقی مسائل جنم لیتے ہیں بلکہ خطرناک حرکات کی نقل بھی بڑھ رہی ہے، جو کسی بڑے سانحے کا سبب بن سکتی ہے۔

انہوں نے والدین پر زور دیا ہے کہ وہ بچوں کی آن لائن سرگرمیوں پر کڑی نظر رکھیں اور انہیں ذمہ دارانہ رویوں کی تربیت دیں، جبکہ متعلقہ اداروں سے بھی مطالبہ کیا گیا ہے کہ اسلحہ کی نمائش اور خطرناک مواد کے خلاف سخت کارروائی عمل میں لائی جائے تاکہ مزید قیمتی جانوں کے ضیاع کو روکا جا سکے۔



Source link

جمعیت علمائے اسلام پاکستان کے سربراہ مولانا فضل الرحمان نے کہا ہے کہ ملک آج سیاسی اور معاشی طور پر مفلوج ہو کر رہ گیا ہے، موجودہ حکمرن عوامی مینڈیٹ کے بجائے مصنوعی بیساکھیوں اور دھاندلی زدہ دستاویزات کے ذریعے مسلط ہیں۔

ایوان اقبال لاہور میں معروف نعت گو شاعر سید سلمان گیلانی کی یاد میں منعقدہ سیمینار سے خطاب کرتے ہوئے سربراہ جمعیت علمائے اسلام مولانا فضل الرحمان نے حکومت پر شدید تنقید کرتے ہوئے اس سے فارم 47 کی پیداوار قرار دے دیا۔

انہوں نے کہا کہ موجودہ حکمران عوامی مینڈیٹ کے بجائے مصنوعی بیساکھیوں اور دھاندلی زدہ دستاویزات کے ذریعے اقتدار پر مسلط ہیں، جس کی وجہ سے ملک آج سیاسی اور معاشی طور پر مفلوج ہو کر رہ گیا ہے۔

مولانا فضل الرحمان نے کہا کہ فارم 47 کے ذریعے بننے والی یہ حکومت نہ تو عوام کی نمائندہ ہے اور نہ ہی اس کے پاس وہ اخلاقی جرات ہے کہ وہ عالمی سطح پر پاکستان کا مقدمہ لڑ سکے یا ملک کے اندرونی بحرانوں کا حل نکال سکے۔

سربراہ جمعیت علمائے اسلام نے کہا کہ کل سے پاکستان میں ایران اور امریکا کے درمیان مذاکرات کا دوسرا دور شروع ہو رہا ہے، جس میں امریکی صدر ڈونلڈ ٹرمپ اور ایرانی قیادت کی آمد متوقع ہے۔

انہوں نے کہا کہ اگرچہ پاکستان کو اس عالمی ثالثی کا اعزاز حاصل ہو رہا ہے لیکن ایک طرف مذاکرات اور دوسری طرف امریکی صدر کی دھمکیاں سمجھ سے بالاتر ہیں۔

ایران کی جانب سے آبنائے ہرمز کی بندش اور اس کے نتیجے میں ملک میں تیل کی بڑھتی ہوئی قیمتوں پر گہری تشویش کا اظہار کرتے ہوئے انہوں نے کہا کہ فارم 47 کے حکمرانوں کی نااہلی اور غلط حکمت عملی کے باعث ہماری سرحدیں اور کاروباری راستے بند ہیں، جس کی وجہ سے چین جیسا قریبی دوست ملک بھی پاکستان میں سرمایہ کاری سے گریزاں ہے۔

مولانا فضل الرحمان نے پالیسی سازوں کو خبردار کیا کہ جب تک ملک میں فارم 47 کی غیر فطری حکمرانی قائم رہے گی، تب تک نہ تو مہنگائی کم ہوگی اور نہ ہی حقیقی استحکام آئے گا۔

انہوں نے کہا کہ جمعیت علمائے اسلام وہ واحد قوت ہے جو فارم 47 کے اس تاریک دور کو ختم کر کے ملک کو ایک شفاف نظام دے سکتی ہے۔

مولانا فضل الرحمان نے بھارت کو مخاطب کر کے کہا کہ کسی بھی جارحیت کی صورت میں جمعیت علمائے اسلام کے کارکن پاک فوج کے شانہ بشانہ سب سے پہلے میدان جنگ میں ہوں گے۔

مولانا فضل الرحما نے سید سلمان گیلانی مرحوم کو خراج عقیدت پیش کرتے ہوئے کہا کہ ان جیسے درویش صفت لوگوں کے جانے سے ایک جہاں یتیم ہو جاتا ہے۔



Source link